Petrol-Diesel Price: पेट्रोल 9 तर डिझेल 7.5 रुपयांनी स्वस्त; जाणून घ्या तुमच्या शहरातील दर

Centre Reduces Excise Duty on Fuel: गेल्या अनेक दिवसांपासून महागाईने त्रस्त असलेल्या भारतीय जनतेला मोठा दिलासा मिळाला आहे. आज (22 मे 2022) पेट्रोल आणि डिझेलच्या किमती स्वस्त झाल्या आहेत. देशभरात पेट्रोल साडेनऊ रुपयांनी आणि डिझेल ७ रुपयांनी स्वस्त झाले आहे. उत्पादन शुल्कात (Excise Duty) कपात केल्यामुळे पेट्रोल आणि डिझेलच्या दरात ही कपात झाली आहे. केंद्र सरकारने (Modi Govt) पेट्रोलवरील उत्पादन शुल्क 8 रुपयांनी आणि डिझेल 6 रुपयांनी कमी केल्याने पेट्रोल 9.50 रुपयांनी आणि डिझेल 7 रुपयांनी स्वस्त झाले आहे.

केंद्रीय अर्थमंत्री निर्मला सीतारामन यांनी शनिवारी संध्याकाळी ट्विट करून जनतेला ही आनंदाची बातमी दिली की केंद्र सरकारने पेट्रोल आणि डिझेलवरील केंद्रीय उत्पादन शुल्क कमी केले आहे. याआधी, 3 नोव्हेंबर 2021 रोजी केंद्र सरकारने पेट्रोलवरील उत्पादन शुल्क प्रति लिटर 10 रुपये आणि डिझेलवर 5 रुपये प्रति लिटरने कमी केले होते. त्यानंतर मार्च-एप्रिलमध्ये तेलाच्या किमतीत सातत्याने वाढ होत होती. युक्रेन आणि रशिया यांच्यात सुरू असलेल्या युद्धादरम्यान आंतरराष्ट्रीय बाजारात कच्च्या तेलाच्या किमतीत झपाट्याने वाढ होत असल्याने त्याचा परिणाम देशांतर्गत बाजारातील पेट्रोल आणि डिझेलच्या किमतींवरही झाला. (Petrol-Diesel Price Today)

दिल्ली ते मुंबई पेट्रोल आणि डिझेल किती स्वस्त?

दिल्लीत काल म्हणजेच शनिवारी पेट्रोलचा दर 105 रुपये 41 पैसे होता, जो आता 96 रुपये 72 पैसे प्रति लिटर झाला आहे. राजधानी दिल्लीत पेट्रोलच्या दरात 8 रुपये 69 पैशांनी घट झाली आहे. तसेच देशाची आर्थिक राजधानी मुंबईत पेट्रोल 9 रुपये 16 पैशांनी स्वस्त झाले आहे. मुंबईत पेट्रोल आता 111.35 रुपये प्रतिलिटर आहे. विशेष म्हणजे दिल्ली, मुंबई, कोलकाता आणि चेन्नई या चार महानगरांपैकी फक्त दिल्लीतच पेट्रोलचा दर 100 रुपयांपेक्षा कमी आहे, तर उर्वरित तीन महानगरांमध्ये मात्र 100 रुपयांच्या पुढे पेट्रोलची विक्री होत आहे.

त्याचप्रमाणे दिल्लीकरांना डिझेलच्या दरात प्रतिलिटर सात रुपये पाच पैशांनी दिलासा मिळाला आहे. कालपर्यंत दिल्लीत एक लिटर डिझेल 96 रुपये 67 पैशांनी विकले जात होते मात्र आजपासून ते 89 रुपये 62 पैशांनी विकले जात आहे. त्याचप्रमाणे मुंबईत डिझेलचा दर 104 रुपये 77 पैशांवरून आता 97 रुपये 28 पैसे प्रति लिटरवर आला आहे. मुंबईत डिझेल 7 रुपये 49 पैशांनी स्वस्त झाले आहे. डिझेल कोलकात्यात 7 रुपये 7 पैसे आणि चेन्नईमध्ये 6 रुपये 70 पैशांनी स्वस्त झाले आहे. राज्य स्तरावर वाहनांच्या इंधनावरील व्हॅटच्या वेगवेगळ्या दरांमुळे, शहरांमध्ये पेट्रोल आणि डिझेलचे दर वेगळे आहेत.

प्रमुख महानगरांमध्ये आज पेट्रोल आणि डिझेलचे दर-

दिल्लीत पेट्रोल 96.72 रुपये आणि डिझेल 89.62 रुपये प्रति लिटर

मुंबईत पेट्रोल 111.35 रुपये आणि डिझेल 97.28 रुपये प्रति लिटर

कोलकात्यात पेट्रोल 106.03 रुपये आणि डिझेल 92.76 रुपये प्रति लिटर

चेन्नईमध्ये पेट्रोल 102.63 रुपये आणि डिझेल 94.24 रुपये प्रति लिटर

केंद्रानंतर या दोन राज्यांनी व्हॅट कमी केला-

केंद्राच्या निर्णयानंतर केरळच्या पिनाराई विजयन सरकारने पेट्रोल आणि डिझेलच्या दरात अनुक्रमे 2.41 रुपये आणि 1.36 रुपये प्रति लिटर कपात केल्याची घोषणा केली आहे. केंद्रानंतर केरळ हे पहिले राज्य आहे ज्याने पेट्रोल आणि डिझेलवर सर्वसामान्यांना दिलासा दिला आहे. केरळमध्ये आता पेट्रोल 11.91 रुपयांनी आणि डिझेल 8.36 रुपयांनी स्वस्त झाले आहे.

याशिवाय राजस्थान सरकारने पेट्रोल आणि डिझेलवरील उत्पादन शुल्कही कमी केले आहे. राजस्थानमध्ये पेट्रोलवर प्रतिलिटर 2.48 रुपये आणि डिझेलवर 1.16 रुपयांनी व्हॅट कमी करण्यात आला आहे. त्यामुळे राज्यात पेट्रोल 10.48 रुपयांनी तर डिझेल 7.16 रुपयांनी स्वस्त झाले आहे.

अशा प्रकारे घरबसल्या तेलाच्या किंमती तपासा-

या वेबसाइटवर क्लिक करा https://iocl.com/petrol-diesel-price किंवा Google च्या प्ले स्टोअरवरून IOC चे अ‍ॅप डाउनलोड करा. तसेच 9224992249 वर एसएमएस करा. यासाठी RSP-स्पेस-पेट्रोल पंप डीलरचा कोड लिहून 9224992249 या क्रमांकावर एसएमएस करावा लागेल. अशा पद्धतीने तुम्ही पेट्रोल डिझेलच्या किमती तपासू शकता