पगार, EMI पासून ATM शुल्कापर्यंत उद्यापासून बदलणार नियम

उद्यापासून म्हणजेच एक ऑगस्ट 2021 पासून महत्वाच्या काही नियमांत बदल होणार आहेत. यामध्ये एटीएमपासून पगार आणि एलपीजी गॅसच्या शुल्काचाही समावेश असणार आहे. याचा थेट परिणाम तुमच्या खिशावर होणार आहे. बदलणारे नियम जाणून घेणं तुमच्यासाठी महत्वाचं आहे. जाणून घेऊयात उद्यापासून नेमके काय बदल होणार आहेत, जेणेकरून तुम्ही यासाठी वेळेत सज्ज व्हाल.

सुट्टीच्या दिवशीही मिळणार वेतन-पेन्शन

आरबीआय म्हणजेच रिझर्व्ह बॅंक ऑफ इंडियाच्या आदेशानुसार एक ऑगस्टपासून सुट्टीच्या दिवशीही खात्यात वेतन आणि पेन्शन जमा होणार आहे. आरबीआयकडून तशा सूचना जारी करण्यात आल्या आहेत. त्यानुसार बल्क पेमेंट सिस्टम म्हणजे नॅशनल ऑटोमेटेड क्लिअरिंग हाऊस आठवड्याचे सातही दिवस उपलब्ध असणार आहे.

तर एटीएममधील कॅश काढल्याचे लागणार शुल्क -

आरबीआयच्या नवीन नियमांनुसार, ग्राहक आपल्या बँकेच्या एटीएममधून महिन्याला पाच मोफत ट्रान्झॅक्शन करु शकतो. त्यानंतर एटीएममधून पैसे काढल्यास अतिरिक्त शुल्क आकारले जाणार आहे. एक ऑगस्टपासून हा नियम लागू होणार आहे. याआधी हे शुल्क 15 रुपये होते. आता हे 17 रुपये इतके झालं आहे. तर सर्व बिगर वित्तीय व्यवहारांवरील शुल्क 5 रुपयांवरून 6 रुपये करण्यात आलं आहे.

आयसीआयसीआयने निर्बंध घातले, शुल्कवाढ केली -

आघाडीची खासगी बँक आयसीआयसीआयनेही आपल्या नियमांत बदल केले आहेत. त्यानुसार रोख व्यवहार, एटीएम इंटरचेंज आणि चेक बुकच्या मर्यादेतही सुधारणा करण्यात आली आहे. एक ऑगस्टपासून यावर शुल्क आकरण्यात येणार आहे. बँकेच्या अधिकृत संकेतस्थालावर दिलेल्या माहितीनुसार, नियमित बचत खाते असलेल्या ग्राहकांना दरमहा चार मोफत व्यवहारांची सुविधा मिळणार आहे. त्यानंर प्रति व्यवहार 150 रुपये आकारले जातील.

एलपीजी गॅस सिलिंडरचे नवे दर

एक ऑगस्ट 2021 पासून घरगुती आणि व्यावसायिक एलपीजी गॅस सिलिंडरच्या किंमतीमध्ये बदल होणार आहेत. प्रत्ये महिन्याच्या सुरुवातीला पेट्रोलियम कंपन्या एलपीजी गॅस सिलिंडरच्या किंमतीमध्ये बदल करतात.

IPPB मध्येही बदल -

इंडिया पोस्ट पेमेंट्स बँकेनेही (IPPB) काही नियमांत बदल केले आहेत. एक ऑगस्टपासून सुधारित नियम लागू होणार आहेत. त्यानुसार, आता घरपोच सेवांवर अधिक शुल्क आकारले जाणार आहे. एक ऑगस्टपासून प्रत्येक घरपोच सेवेसाठी 20 रुपयांचे अधिक जीएसटी द्यावे लागणार आहे. आतापर्यंत यासाठी कोणतेही शुल्क द्यावे लागत नव्हते.