Share Market: शेअर बाजार सकारात्मक! सेन्सेक्स 222 तर निफ्टी 58 अंकांच्या वाढीसह सुरु

Share Market: गेल्या तीन दिवसांपासून शेअर बाजारात होत असलेल्या घसरणीच्या पार्श्वभूमीवर शेअर बाजाराने आज सकारात्मक ओपनिंग दिलं. शेअर बाजार आज हिरव्या चिन्हासह सुरु झाला. निफ्टी दोन्ही निर्देशांक किंचित वाढीसह सुरु झाले. सेन्सेक्स 222.02 अंकांच्या वाढीसह 59,256.97वर सुरु झाला, तर निफ्टी 58.6 अंकांच्या वाढीसह 17,698.15वर सुरु झाला. (Share Market Updates: positive opening in sensex and nifty today)

तत्पूर्वी गुरुवारी भारतीय शेअर बाजार सलग तिसऱ्या दिवशी लाल चिन्हाने अर्थात घसरणीसह बंद झाला. फार्मा वगळता जवळपास सर्वच सेक्टर्समधील विक्रीमुळे सेन्सेक्स आणि निफ्टीमध्ये सुमारे 1 टक्क्यांची घसरण झाली आहे. व्यवहाराच्या शेवटी सेन्सेक्स 575.46 अंकांनी म्हणजेच 0.97 टक्क्यांनी घसरून 59,034.95 वर बंद झाला. दुसरीकडे, निफ्टी 168.10 अंकांनी किंवा 0.94 टक्क्यांनी घसरून 17640 च्या पातळीवर बंद झाला.

आरबीआयच्या धोरणाच्या एक दिवस आधी बाजारात अस्थिरता वाढत असल्याचे दिसून आल्याचे जिओजित फायनान्शियल सर्व्हिसेसचे विनोद नायर म्हणाले. मेटल, पॉवरसह ऑईल अँड गॅससारख्या शेअर्सना जास्त फटका बसला आहे. मिड आणि स्मॉलकॅपलाही फटका बसला आहे. आरबीआयच्या घोषणा बाजाराची जी अपेक्षा आहे(म्हणजे, जर दर बदलले नाहीत आणि चलनवाढीचा अंदाज किरकोळ जास्त राहिला आणि मजबूत आर्थिक दृष्टीकोन असेल तर) तर बाजारामध्ये सकारात्मक कल दिसून येईल असेही ते म्हणाले.