रामेश्वरम कॅफेत बाॅम्ब ठेवलेल्याची माहिती देणाऱ्याला 10 लाखांचं बक्षीस; NIA ची मोठी घोषणा, दहशतवाद्याचा फोटो प्रसिद्ध

एनआयए अधिकाऱ्यांनी अधिकृतपणे रामेश्वरम कॅफे बाॅम्बस्फोटाचा तपास व्यापक केला असून आता बाॅम्ब ठेवलेल्या संशयित दहशतवाद्याचा (Terrorists) फोटो प्रसिद्ध केला आहे. या बाॅम्ब ठेवलेल्या संशयिताची माहिती देणाऱ्याला दहा लाख रुपयांचे बक्षीस देण्याची घोषणाही केली आहे.

यापूर्वी सीसीबीने (CCB) केलेल्या तपासादरम्यान बाॅम्ब ठेवलेल्या संशयिताचा मास्क न लावलेला फोटो सापडला होता. आता तो फोटो एनआयएने प्रसिद्ध केला आहे. एनआयएच्या अधिकाऱ्यांनी मंगळवारी कॅफेला भेट देऊन जागेची पाहणी केली. कॅश काउंटर, सीसीटीव्ही कॅमेरा तपासला आणि कर्मचाऱ्यांकडून माहिती घेतली. पोलिसांनी घटनास्थळी विविध ३८ नमुन्यांची माहितीही एनआयए अधिकाऱ्यांना दिली आहे.

महत्त्वाचा धागा हाती

गृहमंत्री जी. परमेश्वर यांनी बुधवारी पत्रकारांशी बोलताना सांगितले की, पोलिसांना बंगळूरमधील रामेश्वरम कॅफेमध्ये झालेल्या कमी-तीव्रतेच्या बाॅम्बस्फोटाबाबत एक महत्त्वाचा सुगावा मिळाला आहे आणि ते लवकरच या प्रकरणाचा छडा लावतील.

दोन दिवस तपास करणाऱ्या पोलिसांना आणखी काही महत्त्वाचे धागेदोरे मिळाले आहेत. आम्ही हे प्रकरण गांभीर्याने घेतले आहे. या प्रकरणी अद्याप कोणालाही अटक केलेली नाही. संशयाच्या आधारे पोलिसांनी काही जणांना ताब्यात घेतले आणि त्यांच्याकडून माहिती घेत आहेत. राष्ट्रीय तपास यंत्रणा (एनआयए) मंगळवारी या प्रकरणाचा सखोल तपास केला.

नाव गुप्त ठेवणार

एनआयएने नागरिकांना विनंती केली आहे की, अशी व्यक्ती दिसल्यास त्यांनी ताबडतोब ०८०-२९५१०९००, ८९०४२४११०० वर दूरध्वनी, मोबाईलवर माहिती द्यावी. त्यांना संशयित आरोपीबद्दल माहिती असल्यास त्वरित संस्थेला कळवावे. माहिती देणाऱ्याचे नाव गुपित ठेवले जाईल.