Police : तपासात उत्कृष्ट कामगिरी करणाऱ्या 151 पोलिसांना मिळणार 'गृहमंत्री पदक'

नवी दिल्ली : यंदाच्या स्वातंत्र्य दिनानिमित्त (Independence Day) 151 पोलिसांना तपासातील उत्कृष्ट कामगिरीबद्दल 'गृहमंत्री पदक' (Home Minister Medal) प्रदान करण्यात येणार आहे. आज (शुक्रवार) केंद्रीय गृहमंत्रालयानं (Union Ministry of Home Affairs) याबाबत सविस्तर माहिती दिली.

मंत्रालयाच्या म्हणण्यानुसार, ज्या कर्मचाऱ्यांना हे पुरस्कार मिळालेत, त्यात सीबीआयचे 15 (CBI), महाराष्ट्र पोलिस 11 (Maharashtra Police), मध्य प्रदेश पोलिस आणि उत्तर प्रदेश पोलिसांचे प्रत्येकी 10, केरळ पोलिस, राजस्थान पोलिस, पश्चिम बंगाल पोलिस आणि इतर राज्ये/केंद्रशासित प्रदेशातील प्रत्येकी 8 पोलिसांचा समावेश आहे. यामध्ये 28 महिला पोलिसांचाही देखील समावेश आहे.

खरं तर तपासाच्या बाबतीत चांगलं काम करणाऱ्या पोलिसांना दरवर्षी गृह मंत्रालयाकडून गृहमंत्री पदक दिलं जातं. यासाठी या वर्षाच्या सुरुवातीला सर्व राज्ये, केंद्रशासित प्रदेश आणि इतर तपास यंत्रणांकडून पोलिसांची नावं मागविण्यात आली होती. 30 एप्रिलपर्यंत ज्या पोलिस कर्मचाऱ्यांची नावं प्राप्त झाली, त्यापैकी 151 जणांची या पदकासाठी निवड करण्यात आली. गतवर्षीही 152 पोलिसांना हे पदक देण्यात आलं होतं, त्यात 28 महिला पोलिस अधिकाऱ्यांचा समावेश होता. त्याआधी 2020 मध्ये 121 पोलिसांना हे पदक देण्यात आलं होतं.

2018 मध्ये 'गृहमंत्री पदक' पुरस्कार देण्यास सुरू

दहशतवादी, गुन्हेगार आणि नक्षलवाद्यांविरोधात यशस्वी कारवाया करणाऱ्या अधिकारी आणि जवानांना दरवर्षी सन्मानित केलं जात असलं तरी, गुन्ह्याचा चांगल्या प्रकारे तपास करून गुन्हेगारांना तुरुंगात टाकणाऱ्या पोलीस अधिकारी आणि जवानांना मात्र सन्मान मिळाला नव्हता. अशा परिस्थितीत, 2018 मध्ये तत्कालीन गृहमंत्री राजनाथ सिंह यांनी हा पुरस्कार सुरू केला, ज्यामध्ये व्यावसायिकता, प्रामाणिकपणा, निष्ठा आणि कामात असामान्य धैर्य दाखवल्याबद्दल पोलिसांचा सन्मान केला जातो.