कोविड रुग्णालयात आग, आठ जणांचा मृत्यू; पंतप्रधानांकडून दखल

अहमदाबाद : कोविड रुग्णालयात आग लागल्याची घटना अहमदाबाद शहरतील नवरंगपुर या भागात घडली असून या आगीत ८ जणांचा मृत्यू झाला आहे. आज (ता. ०६) सकाळी लागलेल्या या आगीत अनेक जण गंभीर भाजले असल्याचेही सांगण्यात आले आहे. कोरोनाग्रस्तांवरच उपचार केले जात असणाऱ्या श्रेय नावाच्या रुग्णालयात ही आग लागली. 

ताज्या बातम्यांसाठी डाऊनलोड करा ई-सकाळचे ऍप 

पुण्याच्या बातम्या वाचण्यासाठी येथे  क्लिक करा

ही घटना घडल्यानंतर रुग्णालयातील ४० जणांना सुरक्षित बाहेर काढले असून दुसऱ्या रुग्णालयात त्यांना भरती करण्यात आले आहे. मुख्यमंत्री विजय रुपाणी यांनी या घटनेच्या चौकशीचे आदेश दिले असून लवकरात लवकर अहवाल सादर करण्यास सांगितले आहे. त्याचबरोबर, पंतप्रधान नरेंद्र मोदी यांनी मृत पावलेल्या रुग्णांना पंतप्रधान सहायता निधीतून दोन-दोन लाख रुपये अर्थिक सहाय्य देण्याची घोषणा केली आहे. यासोबतच या घटनेत जखमी झालेल्या रुग्णांनाही प्रत्येकी ५० हजार रुपये देण्याचे घोषित केले आहे.

देशात दोन दिवसांत १ लाखांपेक्षा जास्त रुग्ण; आकडा १९ लाख पार

तत्पूर्वी, पंतप्रधान नरेंद्र मोदी यांनी या घटनेवर दुःख व्यक्त केले असून त्यांनी याबाबत ट्विट केले आहे. ट्विट करत त्यांनी या घटनेत मृत पावलेल्या व्यक्तींच्या कुटुंबियांना धीर देण्याच्या प्रयत्न केला आहे. तसेच, जखमी असलेले लोक लवकरच बरे होतील अशी अपेक्षा व्यक्त केली आहे. तसेच, पंतप्रधानांनी सांगितले आहे की, या घटनेबाबत त्यांनी गुजरातचे मुख्यमंत्री विजय रुपाणी आणि अहमदाबादचे महापौर यांच्याशी चर्चा केली आहे. प्रशासन पिडित लोकांना संपूर्ण मदत करेल असेही पंतप्रधानांनी यावेळी सांगितले.

दरम्यान, मुख्यमंत्री विजय रुपाणी यांच्या कार्यालयाकडून देण्यात आलेल्या माहितीनुसार, गृह खात्याच्या अतिरिक्त मुख्य सचिव संगीत सिंह या प्रकरणाचा पुढील तपास करत असून तीन दिवसांत त्यांना या घटनेचा संपूर्ण अहवाल मुख्यमंत्र्यांना देण्यास सांगितले आहे. आतापर्यंत गुजरातमध्ये एकूण ६५ हजार कोरोनाबाधित रुग्णांची नोंद झाली आहे. देशातील टॉप फाईव्ह कोरोनाबाधित रुग्णांच्या यादीत गुजरात एक आहे. गुजरातमध्ये आतापर्यंत एकूण ४८ रुग्णांनी कोरोनावर मात केली आहे.