एका कोरोनाबाधितामागे ९० जणांचा संसर्ग ‘मिसिंग’;फेब्रुवारीत संसर्ग घटणार 

नवी दिल्ली - देशात कोरोना संसर्गाची आकडेवारी आता खूपच कमी झालेली दिसत असली, तरी मागील वर्षी नोव्हेंबरपर्यंत देशात प्रत्येक एका पॉझिटिव्ह रुग्णामागे ९० जणांना झालेला संसर्ग ओळखता आला नव्हता, अशी माहिती आयआयटी खरगपूर येथील डिपार्टमेंट ऑफ कॉम्प्युटर सायन्सचे सदस्य प्रोफेसर मणिंद्र आगरवाल यांनी दिली. 

यासंदर्भात आगरवाल यांनी दिलेल्या माहितीनुसार, ‘‘दिल्ली, केरळ या राज्यांत एका संसर्गामागे २५ जणांचा, तर उत्तर प्रदेश व बिहारसारख्या राज्यांत एका मागे ३०० जणांचा संसर्ग ओळखता आला नाही. देशातील कोविड रुग्णांच्या मागील महिन्यात झालेल्या पृथःकरणातून ही माहिती पुढे आली. डिपार्टमेंट ऑफ सायन्स अॅण्ड टेक्नॉलॉजीने (डीएसटी) स्थापन केलेल्या तज्ज्ञ समितीने ही पाहणी केली. या समितीने विकसित केलेल्या भारताच्या आकडेवारी आधारित सुपरमॉडेलमध्ये फेब्रुवारी २०२१पर्यंत कोरोनाचा संसर्ग आटोक्यात येईल, असे सांगितले आहे. सप्टेंबरमधील आकडेवारीनुसार एका पॉझिटिव्ह रुग्णामागे ६० ते ६५ संसर्ग ओळखता आला नव्हता.’’ 

हे वाचा - वर्षभरात सुमारे दोन हजार कोटींचे ड्रग्स जप्त, DRIची देशभरातील कारवाई

ते पुढे म्हणाले, ‘‘देशात एक पॉझिटिव्ह रुग्णामागे ९०, तर इटली आणि ब्रिटनसारख्या देशांत एका रुग्णामागे १० ते १५ रुग्ण ओळखता आले नव्हते. या लोकांची कधीच चाचणी केली गेली नाही, कारण त्यांच्यात कोणतीही लक्षणे आढळली नव्हती. आमच्या मॉडेलनुसार, दिल्लीतील तिसरी लाट सर्वांत मोठी असली, तरी संसर्गाचा आकडाही तेवढाच होता. मात्र, दुसऱ्या लाटेत एक केसमागे ४३ जणांचा संसर्ग ओळखता आला नव्हता, तर तिसऱ्या लाटेत २१ जणांचा. दिल्ली सरकारने चाचण्यांचे प्रमाण मोठ्या प्रमाणावर वाढविल्याने असे घडले,’’ असे आगरवाल म्हणाले. 

मनसेचा राडा ते ममतांना धक्का! महत्त्वाच्या घडामोडी एका क्लिकवर

डीसीटीच्या या तज्ज्ञ समितीमध्ये आगरवाल यांच्याबरोबर आयआयटी हैदराबादचे प्रोफेसर एम. विद्यासागर, सीएमसी वेलौरचे डॉ. गगनदीप कांग, आयआयटी बंगळूरचे प्रोफेस बिमन बागची, इंडियन स्टॅटिस्टिकल इन्स्टिट्यूटचे प्रोफेसर अरुप बोस व शंकर पॉल व संरक्षण मंत्रालयातील लेफ्टनंट जनरल माधुरी कानिटकर यांचा समावेश होता. 

हे वाचा - दादाच्या आजारपणाचा कंपनीला धसका; जाहिरात घेतली मागे