Karnataka : बंगळूर पोलिस अॅक्शन मोडवर; घरांवर छापे टाकत तब्बल 1344 गुडांविरुद्ध कारवाई

बंगळूर : शहर पोलिसांनी (Bangalore Police) काल पहाटे बंगळुरातील दंगलखोरांच्या घरांवर छापे मारले. शहरातील आठ प्रभागातील १,३४४ गुडांच्या घरांवर छापे टाकून तपासणी केली. यावेळी ९.१ किलो गांजा, गुन्ह्यांसाठी साठवलेली हत्यारे आणि १६ वाहने जप्त करण्यात आली.

आरोपींविरुद्ध कायद्यांतर्गत दोन तर एनडीपीएस कायद्यांतर्गत तीन गुन्हे दाखल केले आहेत. तसेच, या कारवाईत तपास प्रकरणांमध्ये न्यायालयाकडून जारी केलेल्या गुंडाविरुद्ध ४६ अजामीनपात्र वॉरंट जारी केले. फरार झालेल्या आरोपींना अटक करून संबंधित न्यायालयासमोर हजर करण्यात आले.

पश्चिम विभागात १७७, दक्षिण विभागात १७५, उत्तर विभागात २५४, मध्य विभागात ९०, पूर्व विभागात २०७, दक्षिण पूर्व विभागात १६०, ईशान्य विभागात १५६, व्हाईटफिल्ड विभागात १२५ घरांवर छापे टाकले. पोलसांनी गुंडांना पोलिस स्थानकांत नेऊन त्यांची चौकशी केली.

त्यांना कोणत्याही प्रकारच्या उपद्रवी, बेकायदेशीर कृत्ये आणि गुन्हेगारी कृत्यांमध्ये सहभागी न होण्याचा इशारा दिला. पोलिसांनी काही टोळ्यांवरही गुन्हा दाखल केला आहे. पहाटे पाच वाजता सुरू झालेलं हे छापा सत्र सकाळी १० वाजेपर्यंत सुरू होतं.