Air India Urination Case : ..तर 'ही' घटना टाळता आली असती; Air India च्या सीईओंचं मोठं वक्तव्य

Air India Case : एअर इंडिया विमानात (Air India Aircraft) महिलेवर लघवी करणाऱ्या शंकर मिश्राला (Shankar Mishra) अटक करण्यात आलीये. यासोबतच वेल्स फार्गो कंपनीनंही (Wells Fargo Company) त्याला नोकरीवरून काढून टाकलंय.

दरम्यान, याप्रकरणी एअर इंडियाचे मुख्य कार्यकारी अधिकारी (CEO) आणि व्यवस्थापकीय संचालक कॅम्पबेल विल्सन (Campbell Wilson) यांचं मोठं वक्तव्य समोर आलंय. आम्ही चांगलं व्यवस्थापन केलं असतं तर अशा घटना टाळता आल्या असत्या, असं ते म्हणाले आहेत.

या घटनेच्या काही दिवसांनंतर 6 डिसेंबरला पॅरिस-दिल्ली एअर इंडियाच्या (Paris-Delhi Air India) विमानात एका महिला प्रवाशाच्या ब्लँकेटवर आणखी एका मद्यधुंद व्यक्तीनं लघवी केली होती. या दोन्ही प्रकरणांमुळं एअर इंडिया खूप अडचणीत आलीये. पहिली घटना 26 नोव्हेंबरला घडली. जेव्हा शंकर मिश्रा नावाच्या मद्यधुंद व्यक्तीनं एअर इंडियाच्या बिझनेस क्लासमध्ये बसलेल्या एका महिला प्रवाशावर लघवी केली. हे विमान न्यूयॉर्कहून दिल्लीला परतत होतं. या दोन्ही प्रकरणांबाबत एअर इंडियाचं वक्तव्य समोर आलंय.

एअर इंडियाच्या वतीनं सांगण्यात आलंय की, एअर इंडिया विमानात घडलेल्या घटनांबाबत आम्ही चिंतेत आहोत. या कृत्यांमुळं एअर इंडियाच्या प्रवाशांना त्रास सहन करावा लागला. या घटनांबद्दल आम्ही दिलगीरी व्यक्त करत आहोत. एअर इंडियाला हे प्रकरण अधिक चांगल्या प्रकारे हाताळता आलं असतं, पण तसं आमच्याकडून होऊ शकलं नाही. एअर इंडिया या दोन्ही प्रकरणांवर कारवाई करण्यास कटिबद्ध आहे. याप्रकरणी चार केबिन क्रू आणि एका पायलटला कारणे दाखवा नोटीस बजावण्यात आल्याचा दावा एअर इंडियाच्या सीईओंनी केलाय.