Air India : प्रिय प्रवाशांनो! पहिल्या उड्डाणापूर्वी टाटाचा खास संदेश

नवी दिल्ली : सुमारे 69 वर्षांनंतर गुरुवारी एअर इंडियाची मालकी टाटा समूहाकडे (TATA Group) सोपविण्यात आली. त्यानंतर शुक्रवारी या विमानाने प्रवास करणाऱ्या प्रवाशांसाठी टेक ऑफ पूर्वी एक विशेष ऑडिओ (Audio Announcement In Flight) संदेश सादर करण्यात आला. एअर इंडियाने दिल्ली ते मुंबई या दरम्यान, फ्लाइट क्रमांक AI-665 वर हिंदी आणि इंग्रजी अशा दोन्ही भाषेत हा संदेश प्रवाशांसाठी सादर केला. (Air India Special Audio Announcement For Flyers)

काय होता संदेश

"गुड मॉर्निंग... या ऐतिहासिक फ्लाइटमध्ये आपले स्वागत आहे, आज सात दशकांनंतर, एअर इंडिया अधिकृतपणे पुन्हा टाटा समूहाचा भाग बनले आहे. आम्ही तुम्हाला या आणि एअर इंडियाच्या प्रत्येक फ्लाइटमध्ये सेवा देण्यासाठी उत्सुक आहोत. एअर इंडियाच्या भविष्यात आपले स्वागत आहे! आम्ही आशा करतो की तुम्ही प्रवासाचा आनंद घ्याल. धन्यवाद," अशा आशयाचा संदेश विमान उड्डणापूर्वी प्रवाशांसाठी देण्यात आला. (Air India Officially Handed over To TATA Group )

दरम्यान, वित्त मंत्रालयाने एका निवेदनात म्हटले आहे की, टाटा सन्सची पूर्ण मालकीची उपकंपनी असलेल्या टॅलेस प्रायव्हेट लिमिटेडकडून सरकारला 2,700 कोटी रुपये मिळाल्याने एअर इंडियाचा धोरणात्मक निर्गुंतवणूक व्यवहार पूर्ण झाला असल्याचे गुरुवारी जाहीर केले आहे.