ED ने चौकशीच्या नावावर छळ केला; Amazon ची न्यायालयात याचिका

दिल्ली - ऑनलाइन डिलिव्हरी कंपनी अमेझॉनने (Amazon) सक्तवसुली संचालनालय (ED) विरोधात याचिका दाखल केली आहे. २०१९ मध्ये कंपनीविरोधात दाखल करण्यात आलेली याचिका रद्द करण्यासंदर्भात ही याचिका आहे. ईडीने गेल्या काही महिन्यांपासून फ्युचर ग्रुपमध्ये (Future Group) परदेशी गुंतवणूक कायद्याच्या उल्लंघनाचे कारण देत अमेझॉनच्या २०० मिलियन डॉलरच्या गुंतवणुकीची चौकशी सुरु केली आहे.

फ्युचर ग्रुपमधील गुंतवणूक आता कायद्याच्या लढाईत अडकून पडली आहे. फ्युचर ग्रुपने कराराच्या नियमांचे पालन केले नसल्याचा आरोप अॅमेझॉनने केला आहे. फ्युचर ग्रुपने व्यापारी प्रतिस्पर्ध्याप्रमाणे नियमांचे उल्लंघन केले असे अमेझॉनने म्हटले आहे. तसंच अमेझॉनने ईडीकडून केल्या जाणाऱ्या चौकशीला अनावश्यक म्हटलं. ईडीने त्यांच्या विशेषाधिकाराचा वापर करून माहिती घेतली जी फ्युचर ग्रुपच्या व्यवहाराशी संबंधित नव्हती असेही अॅमेझॉनने सांगितले.

न्यायालयत दाखल करण्यात आलेल्या याचिकेत अॅमेझॉनने म्हटले की, त्यांची कंपनीच्या भारतातील प्रमुख आणि इतर कर्मचाऱ्यांचा चौकशीच्या नावावर ईडीने छळ केला. ईडीने मिळवलेली माहिती नियमांच्या विरोधात आहे. भारताच्या कायद्यानुसार ईडीला ती माहिती मिळवण्याचा कोणताही अधिकार नाही असंही याचिकेत म्हटलं आहे. ईडीची चौकशी अनावश्यक आणि त्रास देणारी असून ती रोखण्याची मागणी त्यांनी केलीय.