अपर्णा यादववरून अखिलेश यांनी सोडले मौन; म्हणाले...

मुलायम सिंह यादव यांची सून अपर्णा यादव (Aparna Yadav) भाजपमध्ये प्रवेश करणार असल्याच्या बातम्या मागील काही दिवसांपासून येत आहे. ही आमच्या कुटुंबाची बाब आहे आणि सर्व ठीक आहे, असे सपा प्रमुख (samajwadi party) अखिलेश यादव (Akhilesh Yadav) यावर प्रतिक्रिया देताना म्हणाले. भाजपला आमच्या घराण्याची जास्त काळजी आहे. निवडणुकीत केले जाणारे सर्व कारस्थान यशस्वी होऊ देणार नाही, असे यादव म्हणाले.

उत्तर प्रदेश (Uttar Pradesh) विधानसभा निवडणुकीच्या तारखा जसजशा जवळ येत आहेत, तसतसे नेत्यांमधील पक्षांतराचा काळही तीव्र झाला आहे. अलीकडच्या काळात विद्यमान आमदार स्वामी प्रसाद मौर्य, डॉ. धरमसिंह सैनी आणि दारा सिंह चौहान यांच्यासह अनेक नेते आणि आमदारांनी भाजपमधून सपामध्ये प्रवेश केला, तर इतर अनेक नेत्यांनी स्वतःच्या महत्त्वाकांक्षा लक्षात घेऊन पक्ष बदलला.

दरम्यान, अखिलेश यादव यांच्या घरातून अत्यंत धक्कादायक बातमी समोर आली आहे. नेताजी म्हणजेच मुलायमसिंह यादव यांची धाकटी सून आणि अखिलेश यांचे धाकटे भाऊ प्रतीक यांची पत्नी अपर्णा यादव (Aparna Yadav) भाजपमध्ये प्रवेश करणार असल्याची चर्चा आहे. या बातम्यांना पूर्णविराम देताना अखिलेश यादव (Akhilesh Yadav) यांनी ही त्यांच्या कुटुंबाची बाब आहे आणि सर्व ठीक आहे, असे सांगितले.

भाजपला आमच्या कुटुंबाची जास्त काळजी

अपर्णा यादव यांनी भाजपमध्ये प्रवेश केल्याचे वृत्त दिशाभूल करणारे आहे. भाजपला आमच्या कुटुंबाची जास्त काळजी आहे. पण, याची गरज नाही. उत्तर प्रदेश निवडणुकीसाठी मोठमोठे षडयंत्र आणि कारस्थान केले जात आहे. मात्र, त्यांना यात यश येणार नाही, असेही अखिलेश यादव (Akhilesh Yadav) म्हणाले.

आधी पक्षासाठी काम करा, मग आशा बाळगा

रविवारी प्रगतिशील समाजवादी पक्षाचे राष्ट्रीय अध्यक्ष शिवपाल सिंह यादव यांनी अपर्णा यादव यांची भेट घेऊन त्यांना सपामधूनच निवडणूक लढवण्याचा सल्ला दिला होता. आधी पक्षासाठी काम करा, मग काही आशा बाळगा, असे शिवपाल म्हणाले. तसेच त्यांनी समाजवादी पक्षातच (samajwadi party) राहावे, असेही सांगितले.