Jammu Kashmir : शोपियात दोन जवान शहीद; दहशतवाद्यांसोबत चकमक सुरु

श्रीनगर : गेल्या काही तासांपासून काश्मीरमधील शोपियात सुरक्षा दल आणि दहशतवाद्यांमध्ये चकमक सुरु आहे. या चकमकीत सकाळी एका दहशतवाद्याला कंठस्नान घालण्यात आलं होतं. आता या चकमकीत सुरक्षा दलाचे दोन जवान शहीद झाल्याची माहिती समोर आली आहे. शोपियातील झैनपोरा भागात ही चकमक सुरु आहे. (Two Army jawans lost their lives Shopian, jammu kashmir)

सुरक्षा दलाने झैनपोरा भागातील चेरमार्ग इथं एका दहशतवाद्याला ठार केलं होतं. पोलिस आणि सुरक्षा दलाने संयुक्त शोधमोहिम सकाळपासून या परिसरात राबवली आहे. अद्याप काही दहशतवादी परिसरात लपून बसल्याची शक्यता असून त्यांचा शोध घेतला जात आहे.

या परिसरात जवानांकडून शोधमोहीम राबविण्यात येतेय. या परिसरात दहशतवादी लपल्याची माहिती मिळाल्यावर पोलीस, लष्कर आणि सीआरपीएफच्या संयुक्त पथकाने याठिकाणी शोध मोहीम सुरू केली. जवानांचं पथक संशयित ठिकाणांकडे जात असताना तिथे लपलेल्या दहशतवाद्यांनी त्यांच्यावर गोळीबार सुरू केला. प्रत्युत्तरात एक दहशतवादी मारला गेला.