मोठा खुलासा! PFI चे सदस्य पाकिस्तानच्या संपर्कात; फोनमध्ये सापडले 50 हून अधिक पाकिस्तानी नंबर

भोपाळ : मध्य प्रदेश पोलिसांनी (Madhya Pradesh Police) पीएफआयवर (PFI) कडक कारवाई करण्यास सुरुवात केलीय. त्यामुळं आता पीएफआयचं पाकिस्तान कनेक्शनही (Pakistan Connection) समोर आलंय. अटक करण्यात आलेल्या आरोपींच्या मोबाईलमध्ये 50 हून अधिक पाकिस्तानी नंबर आढळले आहेत.

अनेकवेळा हे आरोपी पाकिस्तानात गेले आहेत, त्यामुळं पोलीस आता टेरर फंडिंगचे पुरावे गोळा करत आहेत. अलीकडंच पीएफआयचे अब्दुल करीम (राज्याध्यक्ष), मोहम्मद जावेद (राज्य कोषाध्यक्ष), जमील शेख (राज्य सचिव) आणि अब्दुल खालिद (महासचिव) यांना अटक करण्यात आली. एटीएस सर्व आरोपींची चौकशी करत आहे. न्यायालयानं आरोपींना 30 सप्टेंबरपर्यंत पोलीस कोठडी सुनावलीय.

तपास यंत्रणा मोहम्मद मेहमूदच्या शोधात

आरोपींचे मोबाईल फोन, लॅपटॉप आणि इतर इलेक्ट्रॉनिक उपकरणं तपासली असता त्यांचं पाकिस्तान कनेक्शन समोर आलंय. सूत्रांकडून मिळालेल्या माहितीनुसार, आरोपी अब्दुल खालिदच्या मोबाईल फोननं अनेक गुपितं उघड केली आहेत. खालिदच्या मोबाईलमध्ये 50 हून अधिक पाकिस्तानी नंबर सापडले आहेत. त्याचा भाऊ मोहम्मद महमूदही 6 वेळा पाकिस्तानला गेला आहे. तपास यंत्रणा मोहम्मद मेहमूदचा शोध घेत आहे.