Viral: 'कुणी तरी येणार येणार गं!' पोलीस ठाण्यातच 'डोहाळे जेवण'

Good News Viral: घरगुती डोहाळे जेवणाचा कार्यक्रम आपण पाहिला आहे, त्यात सहभाग घेतला आहे. हल्ली मोठ्या सेलिब्रेशन हॉलमध्ये देखील तो कार्यक्रम मोठ्या धुमधडाक्यात साजरा होतो. मात्र एखाद्या पोलीस ठाण्यात डोहाळे जेवणाचा कार्यक्रम तुम्ही कधी पाहिला आहे का, सध्या सोशल मीडियावर त्या आगळ्या वेगळ्या डोहाळे जेवणाच्या कार्यक्रमाचे फोटो व्हायरल झाले आहेत.

भोपाळ पोलीस ठाण्यात वरिष्ठ पोलीस अधिकारी असणाऱ्या करिश्मा राजावत यांच्या डोहाळे जेवणाचा कार्यक्रम मोठ्या उत्साहात पार पडला आहे. सध्या सोशल मीडियावर त्याची चर्चाही आहे. त्या ग्वालिएरच्या राहणाऱ्या आहेत. काही दिवसांपूर्वी त्यांनी चाईल्ड लिव्ह साठी अर्ज केला होता. त्यांना एक सरप्राईज गिफ्ट म्हणून या कार्यक्रमाचे आयोजन करण्यात आल्याचे अधिकाऱ्यांकडून सांगण्यात आले आहे. न्युज 18 नं प्रसिद्ध केलेल्या या वृत्तानुसार, भोपाळ मधील पोलीस ठाण्यात आकर्षक सजावट करण्यात आली होती.

पोलीस ठाण्याचे प्रभारी अधिकारी अंजना धुर्वे यांनी याविषयी सांगितलं की, बाकीच्या सर्व स्टाफनं करिश्माच्या डोहाळे कार्यक्रमाचे आयोजन केले होते. त्यात सर्वजण सहभागी झाले होते. त्यामध्ये 25 महिला कर्मचाऱ्यांनी तिच्या बहिणीची, मैत्रीणीची आणि नातेवाईकांची भूमिका पार पाडली. तर 13 पुरुष अधिकाऱ्यांनी तिच्या माहेरची माणसं म्हणून भूमिका निभावली. सगळीकडे आनंदाचे वातावरण होते. तासभर चाललेल्या त्या कार्यक्रमाला सर्वांची साथ मिळाली.

पहिल्यांदाच पोलीस ठाण्यामध्ये अशाप्रकारे एखादा कार्यक्रम पार पडला असेल. सध्या सोशल मीडियावर देखील त्याची चर्चा आहे. केवळ भोपाळमध्येच नाही तर पूर्ण मध्य प्रदेशात अशा प्रकारचा डोहाळे जेवणाचा कार्यक्रम यापूर्वी कधी पार पडलेला नाही. अनेकांनी त्याचे कौतूकही केले आहे.