Bankura Loksabha Election : कम्युनिस्टांच्या बालेकिल्ल्यात भाजपचा प्रभाव

नवी दिल्ली - सलग नऊवेळा मार्क्सवादी कम्युनिस्ट पक्षाने(माकप) आपल्या ताब्यात राखलेल्या पश्चिम बंगालमधील बांकुरा मतदारसंघात गेल्या निवडणुकीत भाजपने पहिल्यांदा उमेदवार जिंकून आणला. केंद्रीय शिक्षण राज्यमंत्री डॉ. सुभाष सरकार यांनी तृणमूल काँग्रेसच्या उमेदवाराचा पराभव केल्यामुळे त्यांना थेट केंद्रीय मंत्रिमंडळात स्थान मिळाले.

एकेकाळी हा मतदारसंघ ‘माकप’चा बालेकिल्ला मानला जात होता. माकपचे ज्येष्ठ नेते वासुदेव आचार्य याच मतदारसंघातून सलग नऊवेळा निवडून आले होते. परंतु विजयाची ही परंपरा २०१४ मध्ये खंडित झाली. पश्चिम बंगालच्या इतर मतदारसंघांच्या तुलनेत या मतदारसंघात मुस्लिम मतदारांचे प्रमाण कमी आहे. या मतदारसंघात मुस्लिम मतदार आठ टक्के तर दलित ३१ टक्के आणि आदिवासी ११ टक्के आहेत.

‘माकप’चा परंपरागत मतदार हा भाजप आणि ‘टीएमसी’मध्ये विभागला गेला. याचाही फायदा भाजपला मिळत आहे. उच्च शिक्षित असलेल्या डॉ. सुभाष सरकार यांना भाजपने पुन्हा उमेदवारी दिली आहे. त्यांच्या विरोधात ‘टीएमसी’ने अरुप चक्रवर्ती यांना उमेदवारी दिली.

गेल्यावेळी काँग्रेसमधून ‘टीएमसी’त दाखल झालेले सुब्रत मुखर्जी यांना उमेदवारी दिली होती. परंतु ते बाहेरचे असल्याने पक्षांतर्गत वाद निर्माण झाला होता. यावेळी ‘सीपीएम’ने निलांजन दासगुप्ता यांना उमेदवारी दिली असली तरी खरी लढत डॉ. सुभाष सरकार आणि टीएमसीचे अरुप चक्रवर्ती यांच्यातच पाहायला मिळणार आहे.