राज्यगीतामधील दोन शब्द बदलल्याने बंगालमध्ये उफाळला वाद; नेमकं प्रकरण काय?

कोलकताः पश्‍चिम बंगालच्या राज्यगीतातील शब्द बदलल्याने राज्यात वाद सुरू झाला आहे. कोलकता आंतरराष्ट्रीय चित्रपट महोत्सवात रवींद्र संगीत- राज्यगीतातील दोन शब्द बदलण्यात आले. त्यामुळे टीका आणि निधेष व्यक्त होत आहे.

चित्रपट महोत्सवात राज्यगीत सुरू होण्यापूर्वी सर्व उपस्थितांना उभे राहण्यास सांगण्यात आले. यावेळी राज्यगीतामधील ‘बंगलाई'ऐवजी बंगला असा बदल केल्याने टीकेचा सूर उमटला. पश्‍चिम बंगालच्या मुख्यमंत्री ममता बॅनर्जी यांनीही फेसबुक पेजवर याचा निषेध केला आहे.

रवींद्र संगीतातील शब्दांतील बदल सुरुवातीला सभागृहातील अनेकांच्या लक्षात आला नाही. पण सोशल मीडियावर व्हिडिओ व्हायरल झाल्यानंतर टीकेचे सूर उमटायला सुरुवात झाली.

ब्रिटिशांनी बंगालची फाळणी पूर्व बंगाल आणि पश्‍चिम बंगाल अशा दोन राज्यांत केली. पूर्व बंगालची राजधानी ढाका तर तत्कालिन कलकत्ता पश्‍चिम भागाची राजधानी होती. या फाळणीचा निषेध करण्यासाठी रवींद्रनाथ टागोर यांनी हे गीत रचले होते.

गाण्याचे ऐतिहासिक महत्त्व लक्षात घेऊन पश्चिम बंगालने ते राज्यगीत म्हणून स्वीकारले आहे. चित्रपट महोत्सवात गीतामधील ‘बंगालीर पोन’, ‘बंगालीर आशा’, ‘बंगालीर सोम’ हे शब्द का बदलले याबद्दल मुख्य गायक आणि राज्यमंत्री इंद्रनील सेन यांनी कोणतीही प्रतिक्रिया दिली नाही.