Bhopal : तीन वर्षांच्या मुलीवर बलात्कार करणाऱ्या बस चालकाच्या घरावर बुलडोझर

भोपाळ : भोपाळमधील (Bhopal) रातीबाद पोलीस स्टेशन हद्दीत (Ratibad Police Station) असलेल्या एका नामांकित खासगी शाळेतील (Private School) नर्सरीच्या विद्यार्थिनीसोबत स्कूल बसमध्ये (School Bus) बलात्कार झाल्यानं खळबळ उडाली होती. मुलीच्या कुटुंबीयांच्या तक्रारीनंतर चालक आणि महिला मदतनीस दोघांनाही अटक करण्यात आली.

रातीबाद पोलीस ठाण्यात आरोपी चालक आणि एका महिलेविरुद्ध बलात्कार आणि पोक्सो कायद्यान्वये (POCSO Act) गुन्हा दाखल करण्यात आलाय. यानंतर बसचालकाच्या घरावर बुलडोझर चालवण्यात आलाय. महसूल विभाग, पोलीस आणि महानगर पालिकेनं संयुक्तरित्या ही कारवाई केलीय.

मंगळवारी हे प्रकरण उघडकीला आलं होतं. या प्रकरणी पीडितेच्या पालकांनी शाळेत तक्रार केली होती. मात्र, शाळेनं स्थापन केलेल्या अंतर्गत चौकशी समितीनं या चालकाला क्लीन चिट दिली. त्यानंतर पीडितेच्या पालकांनी पोलिसांत धाव घेतली. त्यांच्या तक्रारीवरून या बस चालकाला आणि एका महिला कर्मचाऱ्याला अटक केली.

आरोपी विवाहित असून त्याला दोन मुली आहेत. त्यानं तीन महिन्यांपूर्वीच शाळेत काम सुरू केलं होतं. पीडितेनं एका ग्रुप फोटोवरून आरोपीची ओळख पटवली. आरोपी चालक हा शाहपुरा परिसरातील वसंत कुंज कॉलनीजवळील टाकीसमोर बागेच्या जमिनीवर बांधलेल्या घरात राहतो. हे घर अवैध असल्याचं महानगर पालिकेचं म्हणणं आहे. जिल्हा प्रशासनातर्फे ही कारवाई करण्यात आलीय.