GHMC Election: हैदराबादमध्ये भाजपची लांब उडी, 4 वरुन थेट 48

सकाळ वृत्तसेवा
Saturday, 5 December 2020

हैदराबाद महापालिका निवडणुकीत सत्ताधारी तेलंगणा राष्ट्र समिती (टीआरएस) 99 जागांवरुन 55 जागांवर घसरली. यावेळी टीआरएसला मोठा फटका बसला आहे.

हैदराबाद- ग्रेटर हैदराबाद महापालिका निवडणुकीत भाजपने आपली ताकद पणाला लावली होती. त्याचा परिणाम निकालात पाहायला मिळाला आहे. भाजपने जबरदस्त मुसंडी घेत तब्बल 48 जागा जिंकल्या. उत्तर प्रदेशचे मुख्यमंत्री योगी आदित्यनाथ यांनी टि्वट करुन भाग्यनगरच्या भाग्योदयास प्रारंभ होत असल्याचे म्हटले आहे. गत निवडणुकीत 4 जागा जिंकणाऱ्या भाजपने थेट 48 वर उडी घेतली आहे. 

हैदराबाद महापालिका निवडणुकीत सत्ताधारी तेलंगणा राष्ट्र समिती (टीआरएस) 99 जागांवरुन 55 जागांवर घसरली. यावेळी टीआरएसला मोठा फटका बसला आहे. तर असदुद्दीन ओवेसी यांच्या एमआयएमने 44 जागा जिंकून तिसरे स्थान पटकावले आहे. तर भाजपने 48 ठिकाणी विजय नोंदवला आहे. काँग्रेसला तर केवळ दोन जागांवर समाधान मानावे लागले आहे. 

हेही वाचा- बाब्बो! दिवसाची मजुरी 198 रुपये आणि 3.5 कोटींची GST भरण्याची नोटीस

4 वरुन थेट 48 जागांवर भाजप विजयी

वर्ष 2016 मध्ये हैदराबाद महापालिका निवडणुकीत भाजपने केवळ 4 जागांवर विजय मिळवला होता. परंतु, यावेळी त्यांनी 12 पट अधिक जागा मिळवल्या आहेत. यामुळे कार्यकर्त्यांमध्ये कमालीचा उत्साह दिसून येत आहे. दरम्यान, हैदराबाद महापालिकेच्या 150 जागांसाठी 1 डिसेंबर रोजी निवडणूक झाली होती. यातील 149 जागांचे निकाल जाहीर झाले. एका वॉर्डच्या मतमोजणीला उच्च न्यायालयाची स्थगिती आहे. त्यामुळे तेथील मतमोजणी झालेली नाही. 

हेही वाचा- Corona Update : कोरोनाबाधितांचा एकूण आकडा 96 लाखांच्या पार; तर 90 लाख लोक आतापर्यंत कोरोनामु्क्त

या निवडणुकीत टीआरएसने 150 जागांवर तर भाजपने 149 जागांवर उमेदवार उभे केले होते. त्याचबरोबर काँग्रेस 146 ठिकाणी, टीडीपी 106, एमआयएम 51, सीपीआय 17, सीपीआय (एम) 12, राज्यातील इतर नोंदणीकृत पक्षाचे 76 आणि अपक्ष 415 असे उमेदवार निवडणुकीच्या रिंगणात होते. या निवडणुकीत एकूण 1122 उमेदवार उभे होते. 

हेही वाचा- 'भाजपची लाट वगैरे काही नाही; तेलंगणा भाजपला जरुर रोखेल'

हैदराबाद निवडणुकीसाठी प्रभारी नियुक्त करण्यात आलेले भूपेंद्र यादव म्हणाले की, निवडणुकीचे निकाल अत्यंत उत्साहवर्धक आहेत. भाजपचे मनोबल वाढवणारे हे निकाल आहेत. पक्षाचा हा एक नैतिक विजय आहे. पंतप्रधान नरेंद्र मोदी यांचे नेतृत्व आणि सुशासनाचे मॉडेल स्वीकार्य असल्याचे निकालावरुन दिसून येते. भाजप या निवडणुकीत पूर्ण ताकदीने उतरली होती. केंद्रीय गृहमंत्री अमित शहा, पक्षाध्यक्ष जेपी नड्डा, उत्तर प्रदेशचे मुख्यमंत्री योगी आदित्यनाथ आदींबरोबर देशातील दिग्गज नेते प्रचारासाठी हैदराबादला आले होते. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Bjp Gets 48 seats in Ghmc Election 2020 Hyderabad more than aimim