J P Nadda : भाजप अध्यक्षांच्या पत्नीची चोरी झालेली कार अखेर 'येथे' सापडली; चोरट्यांचा नागालँडला घेऊन जाण्याचा होता प्लॅन

नवी दिल्ली : भाजपचे राष्ट्रीय अध्यक्ष जे. पी. नड्डा यांच्या पत्नीची पंधरवड्यापूर्वी दिल्लीतून चोरीला गेलेली मोटरकार उत्तर प्रदेशातील वाराणसी येथे सापडली आहे. ही कार नागालँडला घेऊन जाण्याची योजना होती, असे कारची चोरी केलेल्या शाहिद आणि शिवांग त्रिपाठी नावाच्या पकडण्यात आलेल्या आरोपींनी सांगितले आहे. दोन्ही आरोपी बडकलचे रहिवासी आहेत.

दिल्लीतील गोविंदपुरी भागातून नड्डा यांच्या पत्नीच्या टोयोटा फॉर्च्युनर कारची चोरी झाली होती. आरोपींनी आधी ही गाडी त्यांच्या गावी बडकल येथे नेली. नंबर प्लेट बदलल्यानंतर ही गाडी त्यांनी अलीगड, लखीमपूर खिरी, बरेली, सीतापूर, लखनौ मार्ग वाराणसीला नेली. तेथून ही गाडी नागालॅंडला नेऊन विकली जाणार होती. केंद्रातील सत्ताधारी भाजपच्या राष्ट्रीय अध्यक्षाच्या पत्नीच्या कारची चोरी झाल्याच्या पार्श्वभूमीवर पोलिसांनी कारचा शोध घेण्यासाठी जंग पछाडले होते. सीसीटीव्हीच्या आधारे तपास केला असता सर्वात शेवटी ही कार गुरुग्रामकडे जाताना दिसून आली होती.