अमरिंदर सिंग पोहोचले शहांच्या घरी; महत्वाच्या घडामोडी शक्यता

नवी दिल्ली : पंजाबचे माजी मुख्यमंत्री कॅप्टन अमरिंदर सिंग हे केंद्रीय गृहमंत्री अमित शहा यांच्या दिल्ली येथील निवासस्थानी पोहोचले आहेत. या दोघांमधील भेटीनंतर पंजाबच्या राजकारणात मोठा भूकंप होण्याची शक्यता वर्तवली जात आहे. दोन दिवसांपासून अमरिंदर सिंग हे भाजपमध्ये प्रवेश करणार असल्याच्या चर्चांना उधाण आलं होतं. या पार्श्वभूमीवर ही भेट महत्वाची ठरणार आहे.

कॅप्टन अमरिंदर सिंग यांच्या सचिवांनी सिंग अमित शहा यांची भेट देणार नाहीत त्यामुळे या अफवांवर कोणी विश्वास ठेऊ नये, असं मंगळवारी म्हटलं होतं. पण आज अखेर ही अफवाच खरी ठरतेय की काय? अशी स्थिती निर्माण झाली आहे. अमरिंदर सिंग आणि अमित शहा यांच्यात भेट सुरु असून अद्याप यातील तपशील कळू शकलेला नाही.

दरम्यान, गेल्या आठवड्यात कॅप्टन अमरिंदर सिंग यांनी मुख्यमंत्रीपदाचा राजीनामा दिला होता. तेव्हा पंजाबच्या राजकारणात मोठी खळबळ उडाली होती. त्यानंतर कालच नवज्योत सिंग सिद्धू यांनी काँग्रेसच्या प्रदेशाध्यपदाचा राजीनामा हायकमांडकडे पाठवला होता. त्याचवेळी अमरिंदर सिंग हे अमित शहा यांच्या भेटीला जाणार असल्याची चर्चा सुरु होती. त्यामुळे काल दिवसभर पंजाब देशभरात चर्चेचा विषय ठरला होता.