ओदिशाच्या पहिल्या मुस्लिम महिला आमदाराचा किताब मिळवणाऱ्या सोफिया फिरदौस कोण आहेत?

जेमतेम ३२ वर्षांच्या सोफिया फिरदौस या ओदिशातील पहिल्या मुस्लिम महिला आमदार ठरल्या आहेत.त्यांचे वडील काँग्रेस नेते मोहम्मद मुअक्विम यांच्या जागी सोफिया यांनी निवडणूक लढवली आणि जिंकलीही.

काँग्रेसने सोफियांना जेमतेम महिनाभर आधी तिकीट दिलं होतं.बारबती-कटक मतदारसंघातून सोफिया निवडून आल्या आहेत. भाजपच्या पूर्ण चंद्र महापात्रा यांचा सोफिया यांनी आठ हजार मतांनी पराभव केला आहे.

पण केवळ काँग्रेस नेत्याची मुलगी एवढीच सोफिया यांची ओळख नाही.

• सोफिया सुशिक्षित आहेत. त्यांनी कलिंगा इन्स्टिट्युट ऑफ इंडस्ट्रिअल टेक्नॉलॉजी या संस्थेतून सिव्हील इंजिनीअरिंगची पदवी घेतलेली आहे.

• शिवाय त्यांनी आयआयएम, बंगळुरु येथून 2022 मध्ये व्यवस्थापनशास्त्रातील शिक्षणही घेतले आहे. त्यांनी एक्झिक्युटिव्ह जनरल मॅनेजमेंट प्रोग्रॅम पूर्ण केलेला आहे.

• 2023मध्ये सोफिया फिरदौस यांची कॉन्फेडरेशन ऑफ रीयल इस्टेट डेव्हलपर्स असोसिएशन ऑफ इंडिया (CREDAI)च्या भुवनेश्वर विभागाच्या अध्यक्षपदी निवड झाली होती. क्रेडाइच्या महिला विभागासाठी पूर्व विभागाच्या समन्वयक म्हणूनही काम पाहतात.

• इंडियन ग्रीन बिल्डिंग काऊन्सिल (IGBC) आणि INWEC सारख्या संस्थांमध्येही सोफिया महत्त्वाची पदे भूषवतात.

आणखी महत्त्वाची बाब अशी की ज्या मतदारसंघातून सोफिया निवडून आल्या आहेत, त्या बारबती-कटक मतदारसंघातून ओदिशाच्या पहिल्या महिला मुख्यमंत्री नंदिनी सेतुपती 1972मध्ये निवडून आल्या होत्या.

ओदिशातील लोकसभा जागांवरही यावेळी भाजपचेच प्राबल्य राहिले आहे. त्यामुळे या हिंदुत्त्ववाद्यांचा विजय झालेल्या राज्यात पहिली मुस्लिम महिला आमदार हा किताब मिळवणाऱ्या सोफिया त्या विक्रमाला जागून तसेच काम करतात की केवळ नामधारी राहतात, हे येणारा काळच सांगेल.