काँग्रेस अध्यक्ष कोण होणार? शनिवारी पक्षाची महत्वपूर्ण बैठक

संघटनात्मक बदलासह अनेक मुद्द्यांवर चर्चा करण्यासाठी काँग्रेसनं (Congress Party) शनिवारी सरचिटणीस आणि प्रभारींची बैठक बोलावलीय. सरचिटणीस केसी वेणुगोपाल यांच्या अध्यक्षतेखाली होणाऱ्या या बैठकीला अखिल भारतीय काँग्रेस कमिटीचे सरचिटणीस आणि प्रभारी उपस्थित राहणार आहेत. या बैठकीत विशेष सदस्यत्व मोहीम, संघटनात्मक बदल आणि आंदोलन कार्यक्रमांच्या नियोजनाबाबत चर्चा होण्याची शक्यता आहे.

काँग्रेस पक्षाचे G-23 नेते संघटनात्मक बदलासह पक्षातील अंतर्गत सुधारणांसाठी जोर देत आहेत. काँग्रेस नेत्या सोनिया गांधी (Sonia Gandhi) यांनी मंगळवारी G-23 नेते आनंद शर्मा, मनीष तिवारी आणि विवेक तन्खा यांची नवी दिल्लीतील त्यांच्या निवासस्थानी भेट घेतली. पाच राज्यांमध्ये नुकत्याच पार पडलेल्या विधानसभा निवडणुकीत काँग्रेसच्या पराभवावर हे नेते प्रश्नचिन्ह उपस्थित करत आहेत. पक्षातील अंतर्गत दरी कमी करण्यासाठी सोनिया गांधी या नेत्यांची भेट घेत आहेत.

G-23 नेते संघटनात्मक बदलासाठी जोर देत असल्याचं मानलं जातंय, तर सोनिया गांधी यांनी बैठकीत सांगितलं की ऑगस्ट-सप्टेंबरमध्ये पक्षाध्यक्षपदाच्या निवडणुकीनंतर आवश्यक पावलं उचलली जातील. सोनियांचा अहवाला देत सूत्रांनी सांगितलं की, 'पक्षाध्यक्षाची निवडणूक ऑगस्ट-सप्टेंबरपर्यंत पूर्ण होईल. मात्र, तोपर्यंत पक्षात काही प्रमाणात बदल होऊ शकतो.' दरम्यान, नुकत्याच झालेल्या पाच राज्यांमध्ये (उत्तर प्रदेश, उत्तराखंड, गोवा, मणिपूर आणि पंजाब) काँग्रेसला पराभवाला सामोरं जावं लागलंय. हिमाचल प्रदेश आणि गुजरातमध्ये या वर्षाच्या अखेरीस विधानसभा निवडणुका होणार आहेत.