आजवर केली नाही अशी गोष्ट काँग्रेस पंजाब निवडणुकीसाठी करणार!

जालंधर : विधानसभा किंवा लोकसभा निवडणुकांसाठी आजवर कधीही केलं नाही अशी गोष्ट यंदा काँग्रेस पंजाब निवडणुकांसाठी (Punjab Elections) करणार आहे. याचे संकेत खुद्द काँग्रेसचे माजी अध्यक्ष आणि खासदार राहुल गांधी (Rahul Gandhi) यांनी दिले आहेत. एका सभेला संबोधित करताना राहुल गांधी यांनी पंजाबमध्ये मुख्यमंत्रीपदाचा उमेदवार जाहीर करण्याचे संकेत दिले आहेत. (Congress will do something for Punjab elections that it has never done before)

पंजाबमध्ये सध्या प्रदेशाध्यक्ष नवज्योतसिंग सिद्धू आणि मुख्यमंत्री चरणजितसिंग चन्नी यांच्यामध्ये स्पर्धा सुरु असून त्यांच्यातील स्पर्धेवर तोडगा काढल्यास पुढील महिन्यात सुरु होणाऱ्या प्रचारावर त्याचा परिणाम होऊ शकतो. या पार्श्वभूमीवर राहुल गांधी म्हणाले, दोन लोक पंजाबचं नेतृत्व करु शकत नाहीत कोणातरी एकालाच नेतृत्व करता येईल.

मुख्यमंत्रीपदाच्या उमेदवाराची मागणी आम्ही लवकरात लवकर पूर्ण करु. शक्यतो काँग्रेस कधीही मुख्यंत्रीपदाचा चेहरा जाहीर करत नाही. पण जर काँग्रेसच्या कार्यकर्त्यांना असं वाटत असेल तर आम्ही त्यांची इच्छा पूर्ण करु. पण हा निर्णय कार्यकर्त्यांशी चर्चा करुनच घेतला जाईल, तेच मुख्यमंत्रीपदाचा उमेदवार ठरवतील. पुढील महिन्यात सुरु होणाऱ्या प्रचाराचा शुभारंभ करण्यासाठी ते जालंधर येथे आले होते. यावेळी त्यांनी कार्यकर्त्यांशी संवाद साधला. यावेळी सिद्धू आणि चन्नी व्यासपीठावर उपस्थित होते.

दरम्यान, नुकतेच काँग्रेसनं पंजाबमध्ये मुख्यमंत्रीपदाबाबत भाष्य करताना मुख्यमंत्रीपदाचा उमेदवार हा १४ फेब्रुवारीला निवडणूक पार पडल्यानंतरच घेतला जाईल असं म्हटलं होतं.