नवी दिल्ली- फुंक मारल्यानंतर 40 सेकंदात कोरोना आहे की नाही हे सांगणारे किट लवकरच येणार असल्याचा दावा इस्त्रायलचे भारतातील राजदूत यांनी केला आहे. एका मिनिटात चाचणीचा अहवाल देणारे हे किट भारत आणि इस्त्रायल संयुक्तरित्या विकसित करत आहे.
इस्त्रायलचे राजदूत रॉन मल्का यांनी एका मुलाखतीत सांगितले की, कोरोनाची बाधा झाला की नाही हे तपासण्यासाठी व्यक्तीला एका ट्यूबमध्ये फुंकावे लागेल आणि 30 ते 50 सेकंदात त्याचा अहवाल येईल. हे रॅपिड किट अंतिम टप्प्यात आहे. यासाठी 2 ते 3 आठवड्यांपेक्षा जास्त वेळ लागणार नाही. भारत या रॅपिड किटचे उत्पादन केंद्र बनले आहे. कोविड- 19 ला रोखण्यासाठी साथीच्या आजाराच्या प्रतिबंधासाठी लस विकसित करण्यास दोन्ही देश सहकार्य करतील, असेही ते म्हणाले.
याचदरम्यान, मल्का यांनी आपल्या हजारो नागरिकांना स्वदेशी पाठवण्यासाठी केलेल्या मदतीसाठी भारतीय अधिकाऱ्यांचे आभार मानले. आरोग्य क्षेत्रात इस्त्रायल आयुष्यमान भारताचे सीईओ इंदू भूषण यांच्याबरोबर काम करत असल्याचे सांगितले.
राजदूतांनी सांगितले की हे नवीन रॅपिड किट महत्त्वपूर्ण आहे. विज्ञान आणि तंत्रज्ञानात भारत आणि इस्त्रायल यांच्यात अर्थपूर्ण सहकार्य कसे होऊ शकते याचे हे उत्तम उदाहरण असल्याचे ते म्हणाले. या मोहिमेला 'खुले आकाश' असे नाव देण्यात आले आहे. या किटचा उपयोग विमानतळ आणि इतर प्रमुख ठिकाणी केला जाईल. गुंतवणुकीच्या तुलनेत हे किट अत्यंत स्वस्त असेल.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.