ड्रग्ज इन्स्पेक्टरच्या घरावर धाड, कागदपत्रांसह सापडले सोन-चांदी

अनेकवेळा आपण पोलिसांनी किंवा पोलिस कर्मचाऱ्यांनी लाच घेतल्याच्या घटना वाचल्या आहेत. दरम्यान, आता बिहारमधून अशीच एक घटना समोर येत आहे. बिहारमधील ड्रग्ज इन्स्पेक्टर जितेंद्र कुमार यांच्या घरी दक्षता विभागाने धाड टाकली आहे. या कारवाईत विभागाने नोटांनी भरलेले पाच पोते, कागदपत्रांसह, सोने- चांदीचे दागिने, चार कार आणि काही बँकांचे एटीएम जप्त केले आहेत. (bihar crime news)

यासंदर्भात मिळालेली माहिती अशी, बिहारमधील ड्रग्ज इन्स्पेक्टर जितेंद्र कुमार यांच्या घरी दक्षता विभागाने धाड टाकली आहे. दक्षता विभागाचे पथक कुमार यांच्या घरी पोहचले असता त्यांनी एक खोली उघडली. या खोलीत चार कोटी रुपये किमतीच्या नोटा पाच पोत्यांमध्ये भरुन ठेवल्या होत्या. तर, अडीच किलो चांदी आणि अर्ध्या किलोपेक्षा जास्त सोन्याचे दागिने आढळले आहेत. दरम्यान, छाप्यात सापडलेल्या नोटा मोजण्यासाठी मशीन मागवण्यात आलं होतं.

या छाप्यात मालमत्तेचीअनेक कागदपत्रे पथकाच्या हाती लागली आहेत. जलालपूर शहरात एक फ्लॅट, जहानबादमध्ये घर व जमिनीची कागदपत्रे पथकाच्या हाती लागले आहेत. तर, पाटणा, रांचीमध्ये त्यांचा एक फ्लॅट असल्याचा संशय असून त्याबाबत अधिक तपास करण्यात येत आहे.

या धाडीदरम्यान, ड्रग्ज इन्स्पेक्टर जितेंद्र कुमार यांच्याविरोधात दक्षता विभागाने बेहिशेबी मालमत्ता बाळगल्याप्रकरणी गुन्हा दाखल केला होता. न्यायालयाकडून परवानगी मिळाल्यानंतर दक्षता विभागाने ही कारवाई केली आहे. या पथकाने करोडोंची मालमत्ता जप्त केल्याची माहिती दिली आहे. ड्रग्ज इन्स्पेक्टर जितेंद्र कुमार यांच्याविरोधात दक्षता विभागाने बेहिशेबी मालमत्ता बाळगल्याप्रकरणी गुन्हा दाखल केला होता.

दरम्यान, डीएसपी सुरेंद्र कुमार मौआर यांनी दिलेल्या माहितीनुसार, बेहिशोबी मालमत्ता बाळगल्याप्रकरणी जितेंद्र कुमारविरोधात तक्रार दाखल करण्यात आली होती. त्या तक्रारीच्या आधारावर जितेंद्र कुमार यांच्याशी संबंधित ठिकाणांवर छापेमारी करण्यात आली असून आरोपी कुमार सध्या फरार आहे.