Crime News : JCB चालकाचा 17 वर्षाच्या आदिवासी मुलीवर बलात्कार, पोटात दुखू लागल्यामुळं घटना आली समोर

भोपाळ : राजधानीतील छोला मंदिर पोलीस ठाण्यात (Chhola Mandir Police Station) आदिवासी मुलीच्या (Tribal Girl) तक्रारीवरून जेसीबी चालकावर (JCB Driver) बलात्कार आणि पॉक्सो कायद्यान्वये गुन्हा दाखल करण्यात आलाय. झाबुआच्या थांदला पोलीस ठाण्यात (Thandla Police Station) तक्रार करण्यात आलीये. सध्या पोलीस आरोपीचा शोध घेत आहेत.

छोला मंदिर पोलिस ठाण्याच्या माहितीनुसार, 17 वर्षीय तरुणी झाबुआ जिल्ह्यातील थांदला पोलिस स्टेशन परिसरात राहते. तिचे कुटुंबीय वेगवेगळ्या शहरात मजूर म्हणून काम करतात. काही महिन्यांपूर्वी तिच्या गावातील अनेक लोक राजधानीत कामासाठी आले होते. छोला मंदिर परिसरातील भानपूर परिसरात ते एका बांधकाम सुरू असलेल्या घरात काम करत होते.

काम करत असताना या तरुणीची घटनास्थळी जेसीबी चालवणाऱ्या नरेंद्र यादव नावाच्या तरुणाशी ओळख झाली. 6 जानेवारी रोजी उर्वरित मजूर कामात व्यस्त असताना नरेंद्रनं मुलीला घराच्या निर्जन भागात नेलं. तिथं त्यानं मुलीवर बलात्कार केला. त्याचवेळी घटनेबाबत कोणाला काही सांगितल्यास जीवे मारण्याची धमकी देऊन मुलीला गप्प केलं.

काही दिवसांनी सर्व मजूर आपापल्या गावी परतले. गावात आल्यानंतर अचानक मुलीची प्रकृती ढासळू लागली. नातेवाइकांनी तिला रुग्णालयात नेलं. तिथं तपासणी केल्यानंतर डॉक्टरांनी मुलीवर बलात्कार झाल्याची माहिती दिली. नातेवाइकांनी मुलीकडं विचारपूस केली असता, जेसीबी चालक नरेंद्र यादव तिच्यावर अत्याचार करत असल्याचं तिनं सांगितलं. यानंतर नातेवाईकांनी मुलीला सोबत घेऊन थांदला पोलिस ठाण्यात तक्रार दाखल केली.