दिल्ली : नुपूर शर्मांच्या निषेधासाठी जामा मशीदीजवळ उसळली गर्दी

नवी दिल्ली : प्रेषित मोहम्मद पैगंबरांबाबत आक्षेपार्ह विधानाचं प्रकरण आद्याप शांत झालेलं नाही. हे आक्षेपार्ह विधान करणाऱ्या भाजपच्या निलंबित प्रवक्त्या नुपूर शर्मा यांच्या निषेधासाठी दिल्लीतील जामा मशिदीबाहेर मोठ्या प्रमाणावर मुस्लिम आंदोलक गोळा झाले आहेत. यावेळी नुपूर शर्मांविरोधात घोषणाबाजी करण्यात आली. (Crowds near Delhi Jama Masjid to protest against Napur Sharma)

या आंदोलनाबाबत माहिती देताना जामा मशीदीच्या शाही इमामांनी सांगितलं की, मशिदीच्यावतीनं या आंदोलनासाठी आवाहन करण्यात आलं नव्हतं. लोक आपणहून याठिकाणी आंदोलन करत आहेत. दरम्यान, या ठिकाणी मोठ्या प्रमाणावर गर्दी झाल्यानं सुरक्षा वाढवण्यात आली आहे.

भाजपच्या निलंबित खासदार निपूर शर्मा यांनी न्यूज चॅनेलवरील एका डिबेट शोमध्ये प्रेषित मोहम्मद पैगंबर यांच्यावर आक्षेपार्ह टिपण्णी केली होती. यावरुन जगातील मुस्लिम देशांनी आक्षेप घेत भारताला सुनावण्याचे प्रकार घडले. आंतरराष्ट्रीय पातळीवर हा वाद पोहोचल्यानं भाजपनं यावर स्पष्टीकरण देत आम्ही कुठल्याही धर्माचा आणि धर्म संस्थापकांचा सन्मान करतो. यानंतर त्यांनी प्रवक्त्या नुपूर शर्मा आणि दिल्लीच्या मीडिया सेलचे प्रमुख नवीन जिंदाल यांना पक्षातून तातडीनं निलंबित केलं.