Corona Vaccination: PM मोदींसह इतर मंत्री लस कधी घेणार? संरक्षण मंत्र्यांनी दिलं उत्तर

Corona Vaccination:​ जगभरासह देशात कोरोना संकटाला थोपवण्यासाठी लसीकरण मोहिमेला सुरुवात झाली आहे. शनिवारी पंतप्रधान नरेंद्र मोदींच्या हस्ते देशातील मोठ्या मोहिमेचा शुभारंभ झाला. जगभरातील देशांमध्ये राष्ट्राध्यक्ष, पंतप्रधान आणि प्रमुख राजकीय नेते प्रथम लस घेऊन नागरिकांच्या मनातील भीती कमी करण्याचा प्रयत्न करत आहेत. भारत सरकारने मात्र कोरोना योद्ध्यांना प्राधान्य दिले आहे. विरोधकांकडून देखील मोदी सरकारमधील मंत्री प्रथम लस घेऊन जनतेला लसीची खात्री का देत नाहीत? असा प्रश्न उपस्थित करत आहेत. प्रामुख्याने काँग्रेसच्या नेत्यांनी या प्रकारच्या प्रश्नांनी लसीकरण मोहिमेवर प्रश्नचिन्ह उपस्थिती केले आहे.  

Corona Vaccination: लस घेतल्यानंतर ताप, डोकेदुखी किंवा अंग दुखत असेल तर घाबरु नका

'आजतक' या हिंदी वृत्त वाहिनेच्या खास कार्यक्रमात यासंदर्भातच संरक्षण मंत्री राजनाथ सिंह यांना प्रश्न विचारण्यात आला होता. पंतप्रधान मोंदीसह अन्य नेते लस कधी घेणार? या प्रश्नावर राजनाथ सिंह यांनी देखील थेट उत्तरही दिले. खूप कमी कालावधीत देशातील शास्त्रज्ज्ञांनी कोरोनासारख्या भयावर संकटावर मात करणारी लस शोधून काढली. या कामात सहभागी असलेल्या सर्वांचे आभार मानतो, असे ते म्हणाले.

हेही वाचा- दोन्ही कोराना लशी सुरक्षित, अफवांपासून सावध राहा; PM मोदींच्या भाषणातील प्रमुख मुद्दे

ते पुढे म्हणाले की, पंतप्रधान नरेंद्र मोदी देशातील शास्त्रज्ज्ञांना वेळोवेळी प्रोत्साहन देत आहेत. सध्याच्या घडीला सरकारने लढ्यात सर्वात पुढे असणाऱ्या योद्ध्यांना लस टोचण्याचा प्लॅन केला आहे. या सर्वांना लस टोचून झाल्यानंतर देशातील पन्नाशी ओलांडलेल्या नागरिकांना लस देण्याची प्रक्रिया सुरु केली जाईल. त्यावेळीच पंतप्रधानांसह  सर्व मंत्री आणि राजकीय नेते लस घेतील, असे त्यांनी स्पष्ट केले. 

जगातील ज्या देशात लसीकरणाला सुरुवात झाली त्या देशात प्रमुखांनी प्रथम लस टोचून घेतली आहे. अमेरिकेचे  अध्यक्ष जो बायडेन, अमेरिकेच्या उपाध्यक्ष कमला हॅरिस यांनी तर ब्रिटनमध्ये क्वीन एलिझाबेथ आणि पंतप्रधान बोरिस जॉनसन यांनी लस घेत नागरिकांचा आत्मविश्वास वाढवला. त्यांनी ज्या प्रमाणे त्यांच्या देशातील लोकांची भीती दूर केली तो प्रयोग आपल्या सरकारने का नाही केला? असा प्रश्न आनंदपूर साहिबचे काँग्रेस खासदार मनीष तिवाही  यांनी केला आहे.