Bus Accident: भरधाव बसमध्ये चालकाला हृदयविकाराचा झटका; मृत्यूपुर्वी वाचवले 65 प्रवाशांचे प्राण

पश्चिम बंगालमध्ये एक धक्कादायक घटना समोर आली आहे. चालत्या बसमध्ये चालकाला हृदयविकाराचा झटका आला. अशा स्थितीतही चालकाने ब्रेक दाबला आणि बस रस्त्याच्या बाजुला घेतली त्यामुळे, बसमध्ये प्रवास करणाऱ्या ६५ जणांचे प्राण थोडक्यात बचावले. ही बस बालासोर जिल्ह्यातील निलगिरी भागात असलेल्या पंचलिंगेश्वरला जात होती. बसमध्ये सर्व भाविक होते.

मिळालेल्या माहितीनुसार, सर्व प्रवासी कोलकाता येथील होते. बालासोरमध्येच चालक एस.के अख्तर याला हृदयविकाराचा झटका आला. चालकाच्या छातीत तीव्र वेदना होऊ लागल्याने त्याने बस रस्त्याच्या कडेला थांबवली. यानंतर काही वेळातच तो बेशुद्ध झाला. प्रवाशांनी चालकाला निलगिरी रुग्णालयात उपचारांसाठी दाखल केले. मात्र डॉक्टरांनी त्यांना मृत घोषित केले.

तेथील एका गावकऱ्याने सांगितले की, जेव्हा बस अचानक थांबली तेव्हा त्याला वाटले की, ड्रायव्हरला शौचालयात जायचे आहे. पण जवळ गेल्यावर मला दिसले की, ड्रायव्हर बेशुद्ध पडला होता. ताबडतोब रुग्णवाहिका बोलावून त्याला रुग्णालयात नेण्यात आले. पण, आधीच चालकाचा मृत्यू झाला होता.

गेल्या आठवड्यात हरियाणातूनही अशीच एक घटना समोर आली होती. चालत्या बसमध्ये चालकाला हृदयविकाराचा झटका आला होता. बसचे नियंत्रण सुटल्याने कंडक्टर सावध झाला आणि त्याने शहाणपणा दाखवत लगेचच स्टेअरिंग पकडले. यानंतर बस बाजूला करण्यात आली आणि चालकाला जवळच्या रुग्णालयात दाखल करण्यात आले. त्यामुळे चालकाचा जीवही वाचल्याचे सांगण्यात आले.