JKCA : जम्मू-काश्मीरचे माजी मुख्यमंत्री फारुख अब्दुल्लांना ईडीचं समन्स!

नवी दिल्ली : अंमलबजावणी संचालनालय अर्थात ईडीनं जम्मू-काश्मीरचे माजी मुख्यमंत्री आणि नॅशनल कॉन्फरन्सचे प्रमुख फारुख अब्दुल्ला यांना समन्स पाठवलं आहे. जम्मू काश्मीर क्रिकेट असोसिएशनमधील (JKCA) कथीत आर्थिक गैरव्यवहार प्रकरणी त्यांना ईडीनं चौकशीसाठी बोलावलं आहे. समन्सनुसार ३१ मे पर्यंत अब्दुल्ला यांना ईडीसमोर हजर रहावं लागणार आहे. यापूर्वीच्या समन्सवेळी ते हजर राहू शकले नव्हते म्हणून ईडीनं त्यांना पुन्हा समन्स बाजवलं आहे. (ED summons Farooq Abdullah in JKCA money laundering case)

ईडीनं अब्दुल्ला यांना समन्स बजावलं असल्याचं नॅशनल कॉन्फरन्सनं शुक्रवारी ट्विटद्वारे स्पष्ट केलं आहे. ईडीचं समन्स येणं हे काही आता नवं राहिलेलं नाही, भारतील सर्व विरोधीपक्षांसाठी हे सामान्य झालं आहे. ईडीच्या चौकशीला आम्ही सहकार्य करणार आहोत तसेच आपलं निर्दोषत्व सिद्ध करु असं पक्षानं ट्विटद्वारे म्हटलं आहे.

जम्मू काश्मीर क्रिकेट असोसिएशनमधील आर्थिक घोटाळ्याप्रकरणी यावर्षी मार्च महिन्यात ईडीकडून फारुख अब्दुल्ला यांची ७.२५ कोटी रुपयांची संपत्ती जप्त करण्यात आली होती. बीसीसीआयनं जेकेसीएला दिलेल्या अनुदानाबाबत हा घोटाळा आहे. सन २००२ ते २०११ मध्ये ४३ कोटी रुपयांचा गैरव्यवहार झाल्याचं सांगितलं जात आहे. पण हा घोटाळा ५० कोटी रुपयांचा असल्याचा दावा आता ईडीनं केला आहे. हा घोटाळा बीसीसीआयनं जेकेसीएला दिलेल्या ११२ कोटी रुपयांच्या अनुदानातील भाग होता.

ईडीनं दावा केला आहे की, JKCA चं सध्या बँक अकाऊंट असताना सहा नवे बँक अकाऊंट उघडण्यात आले आहेत. जेकेसीएच्या पार्किंगमधून मिळणाऱ्या पैशासाठी हे आकाऊंट उघडण्यात आलं आहे. तसेच पार्किंगचे पैसे ठेवण्यासाठी आणखी एक अकाऊंट जे जेकेसीएच्या काश्मीर विंगसाठी उघडण्यात आलं आहे.