भाजप प्रवेशाआधी 'नवीन सुरुवात' म्हणत हार्दिक पटेलांनी राहत्या घरी केली पूजा

काँग्रेसमधून बाहेर पडलेले पाटीदार नेता हार्दिक पटेल आज भारतीय जनता पक्षात प्रवेश करणार आहेत. गुजरातमधील कमलम गांधीनगरच्या भाजप कार्यालयात पक्ष प्रमुखांच्या उपस्थितीत हार्दिक पटेल यांचा भाजप प्रवेश होणार आहे. पटेल यांच्या स्वागतासाठी सकाळपासूनच पक्ष कार्यालयाबाहेर पोस्टर्स लावण्यात आले आहेत.

भाजपमध्ये प्रवेश करण्यापूर्वी हार्दिक पटेल यांनी ट्विट करत म्हंटल कि, आपण लहान सैनिक म्हणून काम करणार आहोत. दरम्यान, पक्ष प्रवेशाच्या आधी नवीन सुरुवात म्हणून हार्दिक यांनी आपल्या राहत्या घरी पूजा देखील केली आहे.

हार्दिक पटेल यांनी त्यांच्या अधिकृत ट्विटर हँडलवरून ट्विट करत म्हंटले की, राष्ट्रहित, राज्यहित, जनहित आणि सामाजिक हित या भावनांनी मी आजपासून एका नव्या अध्यायाची सुरुवात करणार आहे. भारताचे यशस्वी पंतप्रधान श्री नरेंद्रभाई मोदी यांच्या नेतृत्वाखाली देशसेवेच्या कार्यात मी एक लहान सैनिक म्हणून काम करेन.

या ट्विटनंतर हार्दिक पटेल यांनी आमदाबाद येथील आपल्या राहत्या घरी पूजा केली. माहितीनुसार पंतप्रधान नरेंद्र मोदी, अमित शहा आणि पक्षप्रमुख जेपी नड्डा यांच्या उपस्थित हार्दिक पटेल भाजपमध्ये प्रवेश करणार आहेत.

दरम्यान, गेल्या कित्येक दिवसांपासून पाटीदार नेता हार्दिक पटेल यांची जोरदार चर्चा सुरु आहे. कित्येक महिन्यांपासून काँग्रेसच्या अंतर्गत कारभारावर नाराजी व्यक्त करत हार्दिक पटेल यांनी १८ मे रोजी काँग्रेस पक्षाच्या सर्व पदांचा राजीनामा देत पक्षाला सोडचिठ्ठी दिली. त्यानंतर दोन दिवसापूर्वीच हार्दिक पटेल यांनी आपण भाजपमध्ये प्रवेश करणार असल्याचं म्हंटल होत.

ज्यानंतर आज पटेल अधिकृतरीत्या भाजप पक्षात प्रवेश करतील. प्रवेशाआधीच हार्दिक यांनी आगामी निवडणुकीत भारतीय जनता पक्षाचा एकतर्फी विजय होणार असल्याचं म्हटलंय.