Railway News : गांधीनगर-मुंबई 'वंदे भारत एक्स्प्रेस' पुन्हा गुरांवर आदळली; दोन महिन्यांत चौथी घटना

मुंबई : गुजरात-मुंबई (Gujarat-Mumbai) दरम्यान धावणारी 'वंदे भारत एक्स्प्रेस' गाडी (Vande Bharat Express Railway) पुन्हा एकदा गुरांवर आदळली आहे. गुरुवारी संध्याकाळी गांधीनगर-मुंबई वंदे भारत एक्स्प्रेसच्या ट्रॅकवर ही गुरं आली होती. रेल्वेच्या एका अधिकाऱ्यानं ही माहिती दिली.

या घटनेत रेल्वेच्या पुढच्या भागाचं किरकोळ नुकसान झालं आहे. दोन महिन्यांपूर्वी या मार्गावर वंदे भारत एक्स्प्रेस सुरू झाल्यापासून ही चौथी घटना आहे. पश्चिम रेल्वेचे मुख्य जनसंपर्क अधिकारी सुमित ठाकूर (Sumit Thakur) यांनी सांगितलं की, 'उदवाडा आणि वापी दरम्यान लेव्हल क्रॉसिंग गेट क्रमांक 87 जवळ संध्याकाळी 6.23 च्या सुमारास ही घटना घडली. यात रेल्वेच्या पुढच्या भागाचं किरकोळ नुकसान झालं आहे. या घटनेमुळं काही वेळ रेल्वे थांबल्यानंतर सायंकाळी 6.35 वाजता गाडी पुढच्या प्रवासाला निघाली.'

'वंदे भारत एक्स्प्रेस'ची गुरांना धडक देण्याच्या घटनांमध्ये सातत्यानं वाढ होत आहे. दोन महिन्यांत चार वेळा जनावरांच्या धडकेनं रेल्वेच्या कामकाजावर परिणाम झाला. याचा फटका प्रवाशांनाही बसला आहे.