Good News : आता विद्यार्थ्यांच्या शैक्षणिक सहलींसाठी सरकारी बसगाड्या मिळणार; परिवहन मंत्र्यांची माहिती

बेळगाव : शक्ती योजनेमुळे (Shakti Yojana) राज्यभरातील विद्यार्थ्यांच्या शैक्षणिक सहलींसाठी सरकारी बसेस उपलब्ध होत नाहीत. यासंबंधी ‘सकाळ’मध्ये बातमी प्रसिद्ध झाली होती. त्याची दखल घेत परिवहन मंत्री रामलिंगारेड्डी यांनी चारही परिवहन मंडळांना (Karnataka Transport Board) बसेस उपलब्ध करून देण्याच्या सूचना दिल्याची माहिती विधानसभेत दिली.

काँग्रेस सदस्य हरीश कुमार यांनी विचारलेल्या प्रश्‍नाला उत्तर देताना त्यांनी माहिती दिली. नोव्हेंबर, डिसेंबर या कालावधीत राज्यभरात विद्यार्थ्यांच्या सहलींचे आयोजन केले जाते. मात्र, राज्यात शक्ती योजना सुरु असल्यामुळे बसेसची कमतरता पडत आहे. यामुळे शाळांना बसेस नाकारल्या जात आहेत.

खासगी बसेस घेऊन जायचा पर्याय त्यांच्याकडे आहे. मात्र, सरकारकडून खासगी बसेसला परवानगी दिली जात नाही. यामुळे सरकारी बसेस शिवाय पर्यायही नाही. यामुळे सरकारने बसेस उपलब्ध करून द्याव्यात अशी मागणी होत आहे. या प्रश्‍नावर ‘सकाळ’ने देखील आवाज उठविला.

प्राथमिक शाळा, हायस्कूलमध्ये विविध भागात सहलींचे आयोजिल्या जातात. केवळ सरकारी बसेसचा वापर करण्याच्या सुचना असल्यामुळे या कालावधीत बसेस मिळणेही कठीण होते. त्यातच यंदा शक्ती योजना लागु झाल्यामुळे बस मिळणेही कठीण झाले आहे. परिवहन मंत्री रामलिंगारेड्डी म्हणाले की, शैक्षणिक दौऱ्यासाठी राज्यातील चारही परिवहन महामंडळांना बसेस उपलब्ध करून देण्याच्या सूचना दिल्या आहेत. अशी माहिती दिली.