हार्दिक पटेल काँग्रेसचा 'हात' सोडणार? हायकमांडला देणार मोठा धक्का!

गुजरात विधानसभा निवडणुकीपूर्वी (Gujarat Assembly Election) काँग्रेसला (Congress) मोठा झटका बसताना दिसत आहे. पाटीदार आंदोलनातून राजकारणात आलेले गुजरात काँग्रेसचे कार्याध्यक्ष हार्दिक पटेल (Hardik Patel) यांनी प्रदेश काँग्रेस नेतृत्वावर प्रश्न उपस्थित केलेत. यावरुन हार्दिक पटेल यांची बंडखोर वृत्ती दिसून येत आहे. हार्दिक यांनी स्वत:ला राम भक्त म्हणवून घेतलंय. आम्हाला हिंदू असल्याचा अभिमान आहे, पण भाजपमध्ये (BJP) प्रवेशबाबत त्यांनी कोणतीही भूमिका स्पष्ट केली नाहीय.

हार्दिक पटेल यांनी राज्य नेतृत्वाबाबत आपली बाजू काँग्रेस हायकमांडसमोर (Congress High Command) मांडलीय. दिल्लीत त्यांनी काँग्रेसचे सरचिटणीस केसी वेणुगोपाल यांच्याशी चर्चा केली. दरम्यान, काँग्रेसच्या प्रदेश नेतृत्वाशी माझी कोणतीही अडचण नाहीय, असं त्यांनी स्पष्ट केलं. गुजरातमधील जनतेचा विरोधी म्हणून आवाज उठवता येत नाहीय, अशी खंतही त्यांनी व्यक्त केली.

गुजरात काँग्रेसच्या वरिष्ठ नेतृत्वानं हार्दिक पटेल यांना जाहीरपणे बोलू नका आणि अंतर्गत प्रकरणावर वैयक्तिक चर्चा करू नका, असा इशाराही दिलाय. यानंतर हार्दिक पटेल राज्य नेतृत्वाबाबत सातत्यानं वक्तव्ये करत आहेत. अशा स्थितीत गुजरात काँग्रेसमध्ये (Gujarat Congress) सर्व काही ठीक नाहीय, असं दिसतंय. जनतेच्या प्रश्नांवर विरोधकांना सरकारच्या विरोधात लढा आणि संघर्ष करावा लागेल, असं हार्दिक पटेल म्हणाले. आपण तसे करू शकलो नाही तर लोक इतर पर्याय शोधतील. गुजरातमध्ये भाजप मजबूत आहे. कारण, त्यांच्याकडं नेतृत्व आहे आणि ते वेळीच योग्य निर्णय घेतात. मात्र, माझा भाजपमध्ये प्रवेश करण्याचा कोणताही विचार नसल्याचं हार्दिक पटेल यांनी स्पष्ट केलं.