हाथरसमध्ये पुन्हा बलात्काराची घटना; चिमुरडीचा मृत्यू

हाथरस (उत्तर प्रदेश) : हाथरसमध्ये झालेल्या सामूहिक बलात्काराने संपूर्ण देश हादरला असताना पुन्हा एक बलात्काराची घटना घडली आहे. सहा वर्षाच्या मुलीवर तिच्या मावसभावानेच बलात्कार केला असून, उपचारादरम्यान तिचा मृत्यू झाला आहे.

निर्भयाची वकील लढवणार हाथरस पीडितेची केस; पण...

याप्रकरणी गुन्हा दाखल करण्यात आला आहे. मृत पीडितेच्या आईचे सात महिन्यांपूर्वी निधन झाले होते. त्यानंतर मावशी पीडितेला आपल्या घरी राहायला घेऊन गेली होती. पीडितेच्या वडिलांनी आरोप केला आहे की, 10 दिवसांपूर्वी मावशीच्या मुलाने पीडितेवर बलात्कार केला. शिवाय, तिला बाथरूममध्ये कोंडून ठेवले. घराबाहेर खेळणाऱ्या मुलांनी पीडितेचा ओरडण्याचा आवाज ऐकला होता. चाइल्ड हेल्पलाइनच्या मदतीने मुलीला उपचारासाठी रुग्णालयात दाखल करण्यात आले होते. प्रकृती खालावत गेल्यामुळे पुढील उपचारासाठी दिल्लीला पाठविण्यात आले. उपचारादरम्यान पीडित मुलीचा आज (मंगळवार) मृत्यू झाला.

एका भयंकर अपघाताचा व्हिडिओ व्हायरल; त्याची काय चूक...

दरम्यान, पीडित मुलीचा मृतदेह दिल्लीहून राहत्या घरी आणत असताना पीडितेच्या कुटुंबियांनी रस्ता रोखला होता. आरोपीला शिक्षा मिळाल्यानंतरच अंत्यसंस्कार केले जातील असे कुटुंबियांचे म्हणणे होते. पोलिसांनी त्यांची समजूत काढून कारवाई करण्याचे आश्वासन दिले. पीडितेच्या वडिलांनी केलेल्या तक्रारीनंतर मावशी आणि तिच्या मुलाविरुद्ध गुन्हा दाखल केला आहे. या प्रकरणातील मावस भावाला अटक करण्यात आली असून, पोलिस पुढील तपास करत आहेत.