"केजरीवाल म्हणाले, मी स्वतंत्र खलिस्तानचा पहिला पंतप्रधान होईल"

पंजाबमध्ये सध्या विधानसभा निवडणुकांचे (Punjab Assembly Elections 2022) वारे वाहत असून, येत्या २० तारखेला मतदान पार पडणार आहे. त्याच पार्श्वभूवर राजकीय नेत्यांमध्ये आरोप प्रत्यारोप सुरू आहेत. प्रसिद्ध कवी आणि आम आदमी पक्षाला सोडचिठ्ठी दिलेल्या कुमार विश्वास (Kumar Vishwas) यांनी दिल्लीचे मुख्यमंत्री आणि आम आदमी पक्षाचे सर्वेसर्वा अरविंद केजरीवाल (CM Arvind Kejriwal) यांच्यावर गंभीर आरोप केले आहेत. केजरीवालांना मी सांगितलं होतं की, फुटीरतावादी संघटनांची मदत घेऊ नका, त्यावर त्यांनी आपल्याला जी उत्तरं दिली ती धक्कादायक होती असा दावा कुमार विश्वास यांनी केला.

अरविंद केजरीवाल यांच्याबद्दल काही धक्कादाय खुलासे करताना कुमार विश्वास यांनी गंभीर वक्तव्य केली आहेत. ते म्हणाले की, केजरीवालांना मागच्याच निवडणुकीत आपण सांगितलं होतं की, फुटीरतावाद्यांपासून दुर राहा, त्यांची मदत घेऊ नका. त्यावर केजरीवाल म्हणाले होते की, तुम्ही काळजी करू नका. एक तर मी एका राज्याचा मुख्यमंत्री होईल किंवा एका स्वतंत्र खलिस्तान राष्ट्राचा पंतप्रधान होईल. केजरीवाल यांना फक्त सत्ता मिळवायची आहे. त्यासाठी ते काहीही करू शकतात असा आरोप कुमार विश्वास यांनी केला.

दरम्यान, पंजाबमध्ये आम आदमी पक्ष, भाजप आणि काँग्रेसने जोरदार तयारी सुरू केली आहे. तीन्ही पक्षांचे मोठे नेते पंजाबमध्ये प्रचारासाठी मैदानात उतरले असून, आम आदमी पक्ष आणि काँग्रेसमध्ये जोरदार टक्क असल्याचं पाहायला मिळतं आहे.