दोन दिवसांत कुंभमेळ्यात एक हजार ‘पॉझिटिव्ह’ !

हरिद्वार (उत्तराखंड) : जगातील सर्वांत मोठा धार्मिक उत्सव समजल्या जाणाऱ्या येथील कुंभमेळ्यात बुधवारी तिसरे शाही स्नान परंपरागत पद्धतीने उत्साहात साजरे झाले. कोरोनाकाळातही कोणतीही खबरदारी न घेता लाखो भाविक स्नानासाठी गंगा नदीच्या किनारी जमले होते. प्रचंड गर्दीमुळे येथे कोरोनारुग्णांच्या संख्येत वाढ झाली असून, गेल्या ४८ तासांत एक हजाराहून भाविक कोरोना पॉझिटिव्ह आढळले आहेत.

दुसरीकडे तिसऱ्या शाही स्नानाची पर्वणी साधण्यासाठी साधू-महंत, विविध आखाड्यांसह लाखो भाविक आज गंगा नदीवर दाखल झाले होते. यातील बहुतेक जण मास्कविनाचा होते. प्रचंड गर्दीमुळे सुरक्षित अंतराच्या नियमाची पायमल्ली झाली. मोठे व प्रतिष्ठित आखाडे शाही मिरवणूक काढत हर की पौडी घाटावर पोहोचत होते. सर्वांत आधी पंचायती आखाडा निरंजनी आणि त्याच्या सहयोगी आखाड्यांनी स्नान केले. त्यानंतर जुना आखाड्याचे स्नान झाले. सकाळी साडेआठपासून सायंकाळी साडेपाचपर्यंत सर्व १३ आखाड्यांसह दहा लाखांपेक्षा अधिक भाविकांना गंगेत स्नानाचा लाभ घेतला. पुढील शाही स्नानाची पुढील पर्वणी येत्या २७ रोजी आहे.

गर्दीमुळे कारवाई अशक्य

कमी गर्दीच्या घाटांवर सुरक्षित अंतराचे पालन न करणाऱ्यांवर दंडात्मक कारवाई करण्यात येत होती. पण मुख्य घाटांवर भाविकांची झुंबड उडाल्याने अशी कारवाई करणे अशक्य झाले होते, अशी कबुली पोलिस अधिकारी संजय गुंजाळ यांनी एका वृत्तवाहिनीशी बोलताना दिली.

कुंभमेळ्याच्या सांगतेसाठी चर्चा

कोरोनाची दुसरी लाट देशभरात पसरली असून ती अधिक घातक असल्याचे वैद्यकीय तज्ज्ञ सांगत आहे. कोरोनाबाधितांची संख्या दिवसेंदिवस वाढत असली, तरी हरिद्वार येथील कुंभमेळातील गर्दी बिलकूल कमी झालेली नाही. उत्तराखंडमध्ये काल कोरोनाचे एक हजार ९२५ लोक बाधित आढळले होते. हरिद्वारमध्ये दोन दिवसांत एक हजार लोकांना संसर्ग झाल्याने नियोजित वेळेआधी कुंभमेळ्याची सांगता करण्यासाठी प्रशासन शक्तिशाली आखाडे व संत-महात्म्यांच्या गटांशी चर्चा करीत आहे. त्यांनी आज शेवटचे स्नान करून हरिद्वार सोडावी, अशी विनंतीही करण्यात आली.