कालीचरण महाराज अखेर पुणे पोलिसांच्या ताब्यात

रायपूर - छत्तीसगढमधील रायपुरमध्ये (Raipur) झालेल्या धर्मसंसदेत महात्मा गांधी (Mahatma Gandhi) यांच्याबद्दल आक्षेपार्ह वक्तव्य केल्याप्रकरणी यापूर्वीच अटक केलेल्या कालीचरण (Kalicharan) महाराज यास खडक पोलिसांनी (Khadak Police) बुधवारी सकाळी ताब्यात घेतले. त्यास दुपारी शिवाजीनगर (Shivajinagar) न्यायालयात हजर केले जाणार आहे. (Pune Police Took Custody of Kalicharan)

समस्त हिंदू आघाडी संघटनेतर्फे 19 डिसेंबर रोजी नातुबाग मैदानात शिवप्रतापदिन (अफझलखान वधाचा आनंदोत्सव) कार्यक्रमात आयोजित केला होता. या कार्यक्रमात समाजामध्ये जातीय तेढ निर्माण होईल असे भडकाऊ आणि चिथावणीखोर भाषणे केल्याप्रकरणी कालीचरण महाराज (रा. अकोला) याच्यासह समस्त हिंदू आघाडीचा कार्याध्यक्ष मिलींद रमाकांत एकबोटे, मोहनराव शेटे, दिपक बाबुलाल नागपुरे,कॅप्टन दिगेंद्रकुमार (रा. राजस्थान), नंदकिशोर रमाकांत एकबोटे यांच्याविरुद्ध खडक पोलिस ठाण्यात गुन्हा दाखल करण्यात आला होता. खडक पोलिस ठाण्याचे पोलिस शिपाई सदानंद ढगे यांनी याबाबत फिर्याद दिली होती.

कालीचरण, एकबोटे यांनी कार्यक्रमात अन्य धर्माच्या नागरिकांच्या भावना दुखावल्या जातील. तसेच धार्मिक श्रध्दांचा अपमान करुन धार्मिक भावनांवर हल्ला करण्याच्या उद्देशाने दोन समाजामध्ये जातीय तेढ निर्माण होईल असे भाषण केले होते. दरम्यान, कालीचरण यास मध्यप्रदेश व छत्तीसगढ पोलिसांनी अटक केली होती. त्यानंतर पुण्यात दाखल फिर्यादीवरुन कालीचरण यास खडक पोलिसांच्या पथकाने रायपुर येथून ताब्यात घेतले, अशी माहिती खडक पोलिस ठाण्याचे वरिष्ठ पोलिस निरीक्षक श्रीहरी बहीरट यांनी दिली.