दिल्लीतील खुनाचा छडा; दिव्यांगच निघाला आरोपी; दोघांना अटक| Murder in Delhi | Sakal
sakal

बोलून बातमी शोधा

murder case

दिल्लीतील खुनाचा छडा; दिव्यांगच निघाला आरोपी; दोघांना अटक

दिल्ली : नववर्षाच्या पूर्वसंध्येला एका व्यक्तीची हत्या (Murder in Delhi) झाली होती. मृतदेहाजवळ दिव्यांग व्यक्ती झोपला होता. पोलिसांनी या खुनाचा छळा लावला आहे. दिव्यांग व्यक्तीच खुनी असल्याचे पोलिस तपासातून पुढे आले आहे. आपल्यावर संशय येऊ नये म्हणून तो रात्रभर मृतदेहाजवळ झोपला होता, असे पोलिसांनी सांगितले. या प्रकरणी पोलिसांनी दोघांना अटक (Both arrested) केली आहे.

सुभाषनगर परिसरातील सूर्या हॉटेलच्या आवारात एका इसमाचा मृतदेह पडून असल्याची माहिती पोलिसांना १ जानेवारी रोजी मिळाली होती. प्राप्त माहितीच्या आधारे पोलिस घटनास्थळी दाखल झाले तेव्हा त्यांना एक मृतदेह दिसून आला. मृतदेहाच्या शरीरावर चाकूने वार करण्यात आले होते. पोलिसांनी मृतदेह ताब्यात घेऊन तपास सुरू केल्यानंतर मृताचे नाव चंदन (रा. सुभाषनगर) असल्याचे निष्पन्न झाले.

हेही वाचा: भीषण अपघात : चार महिला ठार; तर पाच महिला गंभीर जखमी

चंदन हा राजौरी गार्डनमधील अन्सल प्लाझा मॉलमध्ये दोन मित्रांसोबत नवीन वर्ष साजरा करण्यासाठी गेला होता. रात्री १२.३० वाजताच्या सुमारास चंदन हा सिगरेट घेण्यासाठी सूर्या हॉटेलबाहेरील दुकानात गेला होता, असे दोन मित्रांनी पोलिसांना सांगितले. ६५ वर्षीय दिव्यांग संतोष या भिकाऱ्याशी चंदनची भेट झाल्याचे पोलिसांना तपासादरम्यान समजले. दोघेही दारू पिऊन असल्याने कोणत्या गोष्टीवरून त्यांच्यात वाद झाला असावा असा पोलिसांना संशय आहे.

दोघांचा वाद सुरू असताना २० वर्षीय विनोद तिथे आला. विनोद हा दिव्यांग संतोषची काळजी घेत होता. चंदनने दारूच्या नशेत दिव्यांग संतोषशी वाद घातला. यानंतर त्याला मारहाण केली. यामुळे चिडलेल्या संतोष आणि विनोदने चंदनला मारहाण केली. यानंतर विनोद आणि संतोष यांनी चंदनवर चाकूने हल्ला केला. यात चंदनचा मृत्यू (Murder in Delhi) झाला.

हेही वाचा: सोने स्वतःत खरेदीची आताच संधी; भाव ५५ हजारांवर जाणार

दोन्ही आरोपी अटकेत

चंदनचा मृत्यू झाल्याचे समजताच विनोद घटनास्थळावरून पसार झाला. पोलिसांना आपल्यावर संशय येऊ नये म्हणून संतोष मृतदेहाच्या बाजूलाच झोपून होता. दिव्यांग असल्याने पोलिस आपल्यावर संशय घेणार नाही, असा त्याचा समज होता. मात्र, पोलिसांनी खुनाचा छळा लावला आणि दिव्यांग संतोषला अटक केली. यानंतर विनोदलाही पोलिसांनी अटक केली.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :Crime Newsdelhi
loading image
go to top