PM मोदी आणि CM योगी यांचे फोटो फेकले कचऱ्यात; सफाई कामगार निलंबित

मथुरा : मथुरा-वृंदावन महापालिका कार्यालयाजवळील सुभाष इंटर कॉलेजजवळ पंतप्रधान नरेंद्र मोदी (Narendra Modi) आणि उत्तर प्रदेशचे मुख्यमंत्री योगी आदित्यनाथ (Yogi Adityanath) यांचे फोटो कचऱ्यात फेकण्यात आले. शनिवारी (ता. १६) कचराकुंडीत हे चित्र टाकून नेण्यात येत होते. याचा व्हिडिओ सोशल मीडियावर व्हायरल झाल्यानंतर महापालिकेतील कर्मचाऱ्यांमध्ये भीती निर्माण झाली होती. याप्रकरणी कंत्राटी सफाई कामगाराची सेवा समाप्त करण्यात आली आहे. (Narendra Modi and Yogi Adityanath Latest Marathi News)

मिळालेल्या माहितीनुसार, कंत्राटी सफाई कामगार दुलीचंद हा कचरा गाडीत कचरा घेऊन जात होता. कचऱ्याच्या ढिगाऱ्यात पंतप्रधान नरेंद्र मोदी (Narendra Modi) आणि उत्तर प्रदेशचे मुख्यमंत्री योगी आदित्यनाथ (Yogi Adityanath) यांचे फोटो होते. येथून जात असलेल्या नागरिकांनी सफाई कामगाराला अडवले. नरेंद्र मोदी आणि योगी आदित्यनाथ यांचे फोटो कचऱ्यात (garbage) पाहून वाद घालण्यास सुरुवात केली.

सफाई कामगारांनी कचऱ्यातून पंतप्रधान आणि मुख्यमंत्र्यांची छायाचित्रे काढली. मात्र, कार्यालयात ठेवण्याऐवजी कचऱ्याच्या ट्रॉलीत टाकल्याचे लोकांनी सांगितले. नागरिकांनी समजूत घातल्यानंतर सफाई कामगाराने कचरा गाडीतून छायाचित्रे काढली. व्हिडिओ व्हायरल झाल्यानंतर अधिकाऱ्यांना याची माहिती मिळाली.

व्हिडिओ व्हायरल झाल्यानंतर चौकशी

व्हिडिओ व्हायरल झाल्यानंतर या प्रकरणाची चौकशी करण्यात आली. कंत्राटी सफाई कामगारावर तातडीने कारवाई करून सेवा समाप्त करण्यात आली आहे, असे अतिरिक्त महापालिका आयुक्त सतेंद्र तिवारी म्हणाले.