...म्हणून पेट्रोल-डिझेलच्या किमती वाढताहेत; गडकरींनी सांगितलं कारण

देशात पेट्रोल आणि डिझेलचे दर गेल्या काही दिवसांपासून वाढताना दिसत आहेत. त्यावरून विरोधकांकडून सरकावर टीका होत असताना केंद्रीय मंत्री नितीन गडकरी (Nitin Gadkari) यांनी शुक्रवारी या विषयाबद्दल प्रतिक्रिया दिली. यावर बोलताना ते म्हणाले की, रशिया आणि युक्रेनमध्ये (Russia Ukraine Crisis) सुरू असलेल्या युद्धामुळे आंतरराष्ट्रीय बाजारात तेलाच्या किमती वाढल्या आहेत. सध्या परिस्थिती भारत सरकारच्या नियंत्रणाबाहेर आहे. 'एबीपी नेटवर्क'च्या 'आयडियाज ऑफ इंडिया' परिषदेत बोलताना त्यांनी ही माहिती दिली.

देशात पेट्रोल आणि डिझेलचे दर गगनाला भिडत आहेत. भारतीय तेल कंपन्यांनी आज (शनिवार) 26 मार्च रोजी पुन्हा पेट्रोल आणि डिझेलच्या दरात वाढ केलीय. या आठवड्यातील पाच दिवसांत चौथ्यांदा पेट्रोल आणि डिझेलच्या दरात वाढ करण्यात आलीय. इंडियन ऑइल मार्केटिंग कंपन्यांनी पेट्रोल आणि डिझेलच्या दरात प्रति लिटर 80 पैशांनी वाढ केलीय. अशाप्रकारे पाच दिवसांत पेट्रोल आणि डिझेलच्या दरात 3.20 रुपयांनी वाढ झालीय.