देशातील पेट्रोल डिझेलच्या तुटवड्याबाबत केंद्राचे स्पष्टीकरण

नवी दिल्ली : केंद्र सरकारने देशात पेट्रोल आणि डिझेलच्या तुटवड्याबाबत स्पष्टीकरण दिले आहे. देशात पेट्रोल आणि डिझेलची कमतरता नसल्याचे सरकारने म्हटले आहे. देशातील उत्तराखंड, झारखंड, राजस्थान, गुजरात आणि मध्य प्रदेशमध्ये पेट्रोल पंपांवर इंधनाचा तुटवडा असल्याच्या बातम्या मोठ्या प्रमाणात व्हायरल झाल्या होत्या त्यानंतर केंद्राकडून वरील स्पष्टीकरण देण्यात आले आहे. (Petrol Diesel Shortage News )

गेल्या काही दिवसांपासून काही भागात PSU रिटेल आउटलेटवर प्रचंड गर्दी पाहण्यास मिळत होती. यामुळे अनेकांना गर्दी आणि पेट्रोल भरण्यास विलंब अशा अडचणींना सामोरे जावे लागले होते. या गर्दी आणि विलंबानंतर नागरिकांमध्ये देशात पेट्रोल आणि डिझेलचा तुटवडा निर्माण झाल्याच्या बातम्या मोठ्या प्रमाणात व्हायरल होऊ लागल्याचे पेट्रोलियम मंत्रालयाने सांगितले. परंतु, देशातील काही विशिष्ट भागात पेट्रोल आणि डिझेलच्या मागणीत वाढ पाहण्यास मिळाल्याचं मंत्रालयाने म्हटलं आहे.

मागील वर्षाच्या तुलनेत जून 2022 च्या पहिल्या सहामाहीत पेट्रोल (Petrol) आणि डिझेलच्या (Diesel) मागणीत 50 टक्के वाढ झाली आहे. यामध्ये विशेषत: राजस्थान, मध्य प्रदेश आणि कर्नाटक या राज्यांमध्ये अधिक मागणी दिसून आल्याचे मंत्रालयाने म्हटले आहे. दरम्यान ही वाढ कृषी कामांमुळे झाल्याचे मंत्रालयाने सांगितले. त्यामुळे घाऊक पेट्रोल आणि डिझेलची खरेदी करणारे आता किरकोळ पेट्रोल पंपांवरून खरेदी करत असल्याने अडचणीही वाढल्या आहेत. खासगी मार्केटिंग कंपन्यांनी विक्री कमी केल्याने त्याचा बोजा सरकारी कंपन्यांवर पडल्याचेही पेट्रोलियम मंत्रालयाने (Petrolatum Ministry ) म्हटले आहे.