मोदींच्या राजकीय कारकीर्दीवर राष्ट्रीय परिषदेचे आयोजन

नवी दिल्ली : नरेंद्र मोदींच्या दोन दशकांच्या राजकीय कारकीर्दीवर दिल्लीत राष्ट्रीय परिषदेचे आयोजन करण्यात आली आहे. येत्या 27 ते 29 ऑक्टोबर या दरम्यान दिल्लीतील इंडिया इंटरनॅशनल सेंटर येथे ही राष्ट्रीय परिषद होणार आहे.

रामभाऊ म्हाळगी प्रबोधिनी ही परिषद आयोजित केली आहे. लोकशाहीची परिणामकारता (डिलिव्हरिंग डेमॉक्रसी) : नरेंद्र मोदी यांच्या 20 वर्षांच्या राजकीय कारकीर्दीचा आढावा, असा परिषदेचा विषय आहे. खासदार विनय सहस्रबुद्धे यांनी पत्रकार परिषदेत ही माहिती दिली.

केंद्रीय गृहमंत्री अमित शहा हे या परिषदेचे उद्घाटन करणार आहेत. देवेंद्र फडणवीस यांची उपस्थिती यावेळी असेल. भाजपचे राष्ट्रीय अध्यक्ष जे. पी. नड्डा यांच्या उपस्थितीत समारोप होईल. मोदी यांचे परराष्ट्र धोरण, गरीब कल्याण योजना, नवीन शैक्षणिक धोरण आदी विषयांवर या परिषदेत चर्चा होणार आहे. देशातील विविध विषयांवरील तज्ज्ञ आणि अधिकारी या परिषदेला उपस्थित राहणार आहेत.

मोदी सरकारच्या काळातील आरोग्य आणि कोविड व्यवस्थापन, सामाजिक न्याय, महिला सबलीकरण तसेच लोकन्यायाच्या योजनांची अंमलबजावणी करण्याचे त्यांचे कौशल्य, मोदी सरकारचे कृषी धोरण आदी विषय देखील परिषदेत चर्चिले जाणार आहेत.