Accident : लग्नाला जात असताना काळाचा घाला; भीषण अपघात पप्पू यादव यांच्यासह अनेक नेते जखमी; कारचा चक्काचूर

बक्सर : आरा-बक्सर राष्ट्रीय महामार्गावर (Ara-Buxar National Highway) मंगळवारी रात्री उशिरा भीषण अपघात झाला. या अपघातात माजी खासदार आणि जन अधिकार पक्षाचे संयोजक पप्पू यादव (Jan Adhikar Party Pappu Yadav) थोडक्यात बचावले.

त्याचवेळी या अपघातात बीएमपीचे 2 कर्मचारी आणि चालकासह एकूण 11 जण जखमी झाले आहेत. माजी खासदार पप्पू यादव (Pappu Yadav) आपल्या कार्यकर्त्यांसोबत लग्नाला जात असताना ही घटना घडली.

ब्रह्मपूर पोलीस ठाण्याच्या (Brahmapur Police Station) हद्दीतील देवकुळी गावाजवळ हा भीषण अपघात झाला. ट्रकला ओव्हरटेक केल्यामुळं हा अपघात झाला. सर्व जखमींना जवळच्या रुग्णालयात दाखल करण्यात आलंय.

पप्पू यादव यांच्या सुरक्षेसाठी तैनात असलेले जवानही गंभीर जखमी झाले आहेत. स्कॉटची कार पलटी होऊन रस्त्याच्या कडेला गेली. याशिवाय, या भीषण रस्ता अपघातात पक्षाचे वरिष्ठ नेते, कार्यकर्ते, चालक, जवान असे 11 जण जखमी झाल्याचं पप्पू यादव यांनी सांगितलं. अपघातात पप्पू यादव यांनाही किरकोळ दुखापत झालीये.