मोठी बातमी! कोरोनावर सर्वाधिक प्रभावी ठरलेले औषध वापरण्यास भारत सरकारची परवानगी 

नवी दिल्ली- देशात कोरोनाबाधित रुग्णांची संख्या झपाट्याने वाढत असताना भारत सरकारने रुग्णांवर कमी किमतीचे स्टेरॉईड डेक्सामेथासोन वापरण्यास परवानगी दिली आहे. मेथिलप्रेडनिसोलोनला पर्यायी म्हणून डेक्सामेथासोन वापरले जाणार आहे. मध्यम आणि गंभीर अवस्था असलेल्या कोरोनाग्रस्तांना हे औषध दिले जाणार आहे. ब्रिटनने डेक्सामेथासोन हे औषध अत्यंत प्रभावी असल्याचा दावा केला होता. 

कोरोनाबाबत दिलासादायक बातमी; कोरोनाग्रस्त रुग्ण वाढत असलेतरी..
केंद्रीय आरोग्य मंत्रालयाने यासंबंधी मंजुरी दिली आहे. त्यामुळे डेक्सामेथासोनच्या वापराचा मार्ग मोकळा झाला आहे. आरोग्य मंत्रालयाने डेक्सामेथासोनच्या वापरासंबंधी काही सूचना जाहीर केल्या आहेत. त्यानुसार मध्यम आणि गंभीर अवस्था असणाऱ्या रुग्णांवर, तसेच ज्यांना ऑक्सिजन सपोर्टची गरज आहे अशांना हे औषध दिले जाणार आहे.

डेक्सामेथासोन या औषधावर सर्वप्रथम ब्रिटनमध्ये प्रयोग करण्यात आले होते. ब्रिटनने हे औषध कोरोनावर आतापर्यंतचे सर्वाधिक प्रभावी असल्याचं म्हटलं आहे. तसेच  डेक्सामेथासोनचा वापर करुन गंभीर अवस्था असलेल्या तीन रुग्णांपैकी एका रुग्णांचा जीव वाचवला जाऊ शकतो, असा दावा ब्रिटनच्या वैज्ञानिकांनी केला आहे.  डेक्सामेथासोन हे औषध संधीवात, दमा, सूज अशा आजारांवर वापरले जाते. गेल्या अनेक वर्षांपासून या औषधाचा वापर होत आहे. शिवाय डेक्सामेथासोन सर्वसामान्यांना परवडणारे आहे. 

धक्कादायक! कोरोनाबाधित रुग्णाचा मृतदेह नेण्यासाठी जेसीबीचा वापर
जागतिक आरोग्य संघटनेकडूनही या औषधाच्या वापराला परवानगी मिळाली आहे. गंभीर असणाऱ्या कोरोनाग्रस्त रुग्णांवर याचा वापर केला जाऊ शकतो, असं डब्ल्यूएचओने म्हटलं आहे. डेक्सामेथासोनचे चांगले परिणाम दिसून येत आहेत. त्यामुळे या औषधाचे उत्पादन वाढवून ते वितरित केले जाणे आवश्यक आहे, असं जागतिक आरोग्य संघटनेचे महासंचालक टेंड्रोस अँधोनम घेब्रेयेसस म्हणाले आहेत.

दरम्यान, देशात कोरोनाबाधितांची संख्या दिवसागणिक वाढत आहे. आरोग्य मंत्रालयाने जाहीर केलेल्या शुक्रवारच्या आकडेवाडीनुसार, देशातील कोरोनाबाधितांचा आकडा 5 लाखांच्या पुढे गेला आहे. तसेच एका दिवसात सर्वाधिक 18,552 कोरोनाबाधित आढळले आहेत. भारत कोरोनामुळे सर्वाधिक प्रभावित चौथा देश ठरला आहे. अमेरिका या यादीत पहिल्या क्रमांकावर आहे. तर ब्राझिल आणि रशिया अनुक्रमे दुसऱ्या आणि तिसऱ्या स्थानी आहेत.