पंजाबच्या निवडणुका पुढे ढकलल्या... निवडणूक आयोगाचा मोठा निर्णय

निवडणूक आयोगाने मोठा निर्णय घेत पंजाब राज्याच्या विधानसभा निवडणुका पुढे ढकलण्याचा निर्णय जाहीर केला आहे. 14 फेब्रुवारीला पार पडणाऱ्या या निवडणुका आता 20 तारखेला होतील. तर 10 मार्चला मतमोजणी होणार आहे. (punjab assembly election dates postponed)

पंजाबमध्ये (Punjab) १४ फेब्रुवारीला होणारी निवडणूक पुढे ढकलण्यासाठी सर्वच राजकीय पक्षांनी निवडणूक आयोगाकडे (Election Comission) धाव घेतली होती. १४ फेब्रुवारीला होणारं मतदान पुढे ढकलण्याची मागणी भाजप (BJP), काँग्रेससह (Congress) अनेक पक्षांनी केली आहे. मुख्यमंत्री चरणजीत सिंग चन्नी, भाजप आणि बसपा यांनी निवडणूक आय़ोगाला या संदर्भात पत्र लिहिलं आहे. त्यानंतर निवडणूक आयोगाने बैठक घेऊन हा निर्णय जाहीर केला आहे.

काय आहे कारण?

निवडणूक पुढे ढकलण्याबाबत लिहिलेल्या पत्रात म्हटलं आहे की, १६ फेब्रुवारीला संत रविदास जयंती आहे. पंजाबमध्ये लाखो भाविक त्यांची पूजा करण्यासाठी वाराणसीला जातील. अशा स्थितीत ते मतदान करू शकणार नाहीत. त्यामुळे निवडणुकीची तारीख बदलण्यात यावी. अशी मागणी मुख्यमंत्री चरणजीत चन्नी यांनी पत्राद्वारे केली होती.

याशिवाय भाजप आणि अमरिंदर सिंग यांनीही निवडणूक आयोगाला पत्र लिहून निवडणुका पुढे ढकलण्याची मागणी केली होती. त्यानंतर आयोगाची बैठक पाडली. अखेर 14 फेब्रुवारीला होणाऱ्या निवडणुका 20 फेब्रुवारीला पार पडणार आहेत. आणि मतमोजणी ठरल्याप्रमाणे 10 मार्चला होईल.