अंमली पदार्थाची तस्करी करणारे पाकिस्तानी ड्रोन भारतीय जवानांनी पाडले

नवी दिल्ली : पंजाबमधील अमृतसरमध्ये पाकिस्तानी ड्रोन घुसल्याचा प्रकार उघडकीस आला असून, दुपारी दीड वाजण्याच्या सुमारास भारतीय सैन्यदलांकडून हे ड्रोन पाडण्यात आलं आहे. अमृतसर सेक्टरमधील धानोन कलान गावाजवळ हा प्रकार घडला आहे.

भारताच्या हवाई सीमेवर पाकिस्तानच्या बाजूने काहीतरी संशयास्पद हालचाल होत असल्याची माहिती भारतीय सैन्यदलाला मिळाली आणि त्यानंतर सैनिकांकडून गोळीबार करत हा ड्रोन खाली पाडण्यात आला आहे. ड्रोन खाली पडल्यानंतर भारतीय जवानांनी ताब्यात घेऊन त्याची माहिती मिळवली आहे. ताब्यात घेण्यात आलेले ड्रोन हे चीनी बनावटीचे असून DJI Matrice 300 असं या ड्रोनचं नाव असल्याचं माहितीतून समोर आलं आहे.

पाडण्यात आलेल्या ड्रोनद्वारे अंमली पदार्थांची तस्करी होत असल्याची माहिती भारतीय सीमा सुरक्षा दलाच्या जवानांनी दिली आहे. पण पाकिस्तानचा हा प्रयोग जवानांनी हाणून पाडला आहे.

दरम्यान गेल्या काही महिन्यांपासून पाकिस्तानकडून भारतीय हद्दीत घुसण्याचे अनेक प्रयत्न केले जात आहेत, मात्र प्रत्येक वेळी बीएसएफच्या सतर्क जवानांनी पाकिस्तानचा हा प्रयत्न हाणून पाडला आहे. काही दिवसांपूर्वी अटारीवरून एक पाकिस्तानी ड्रोन उडताना भारतीय लष्करांना दिसले होते. हे ड्रोन भारतीय सीमा ओलांडत असताना सुमारे 5 किलोमीटर आत आले होते. यापूर्वी 21 एप्रिल रोजी गुरुदासपूर सेक्टरमध्ये 4 वेळा ड्रोनद्वारे घुसखोरीचा प्रयत्न पाकिस्तानकडून करण्यात आला होता. त्याला मारण्यासाठी बीएसएफला सुमारे 165 राउंड फायर करावे लागले होते.