Rajasthan Assembly Election Results 2023 : राजस्थानात काँग्रेसचा दारुण पराभव; मुख्यमंत्री गेहलोतांनी राज्यपालांकडं राजीनामा केला सुपूर्द

Rajasthan Assembly Election Results 2023 : राजस्थान विधानसभा निवडणुकीत काँग्रेसचा दारुण पराभव झाल्यानंतर मुख्यमंत्री अशोक गेहलोत (Ashok Gehlot) यांनी आज (रविवार) आपल्या पदाचा राजीनामा दिला. गेहलोत आज सायंकाळी राजभवनात पोहोचले आणि त्यांनी राज्यपाल कलराज मिश्रा यांच्याकडं मुख्यमंत्रिपदाचा राजीनामा सुपूर्द केला.

राजभवनच्या नियमानुसार, राज्यपाल मिश्रा यांनी तत्काळ प्रभावाने राजीनामा स्वीकारला आणि राज्यात नवीन सरकार स्थापन होईपर्यंत काम करत राहण्याचं आवाहन केलं.

विधानसभा निवडणुकीत राज्यातील 200 पैकी 199 जागांवर मतदान झालं. त्याचा निकाल आज लागला. भारतीय जनता पक्षाला 106 जागा जिंकून स्पष्ट बहुमत मिळालं आहे. संध्याकाळी 6.45 वाजेपर्यंत त्यांचे उमेदवार नऊ जागांवर आघाडीवर आहेत. म्हणजेच, एकूण आकडा 115 वर पोहोचताना दिसत आहे. तर, काँग्रेस 69 जागांवर मर्यादित दिसत आहे. त्यांचे उमेदवार 60 जागांवर विजयी झाले असून नऊ जागांवर ते पुढे आहेत.