प्रेयसीच्या लॅपटॉपसाठी प्रियकराची करामत; तिघांना लुटलं!

राजस्थानमधल्या कोटामध्ये एका प्रियकराने आपल्या प्रेयसीला खूश कऱण्यासाठी एक अजब प्रकार केला आहे. हा प्रकार पाहून पोलिसही अचंबित झाले आहेत. आपल्या मित्रासोबत त्याने तीन जणांना चक्क लुटलंय. (Rajasthan man robbed 3 people for girlfriend)

या विचित्र स्वभावाच्या प्रियकराने एक डिलीव्हरी बॉय, पेट्रोल पंपावरचा कर्मचारी आणि एका भाजीवाल्याला लुटलं आहे. यामध्ये त्याने त्याच्या मित्राचीही मदत घेतली आहे. आपल्या प्रेयसीचा गहाण ठेवलेला लॅपटॉप सोडवण्यासाठी या तरुणाने चाकूचा धाक दाखवत अशा प्रकारे लूट केल्याची माहिती मिळत आहे.

एकाच दिवसात लागोपाठ झालेल्या तीन घटनांनंतर शहरात चांगलीच खळबळ माजली. पोलिसांनी तात्काळ ठिकठिकाणी नाकाबंदी केली आणि काही वेळातच या दोघांनाही ताब्यात घेतलं. या दोघांनीही लूट केल्यानंतर आपले कपडे बदलले. नाकाबंदीमधून बाईकवरुन निघण्याच्या प्रयत्नात असतानाच पोलिसांनी या दोघांनाही पकडलं आहे.